Willemstad: Tradishonalmente e di dos djasabra di luna di òktober, ta konmemorá e dia di trahadónan di prizòn. Normal esaki ta keda konmemorá i selebrá durante henter un siman, kaminda vários aktividat ta keda organisá pa trahadónan di prizòn i tambe ku oportunidat ku tur kolega ku ta traha den prizòn, lo por topa otro koleganan di Boneiru, Aruba, St.Maarten i Sürnam, p’asina interkambiá i sosialisá den vários aktividat huntu.
E aña aki den kuadro di COVID-19, gerensia di SDKK, no ker a laga e fecha akí pasa sin organisá algu pa su trahadónan. P’esei a organisá un mainta sosial i spiritual titulá: Mi Tin Balor.
Pa trata e tema aki, Pastor Raimy Juliet tabata orador invitá i a trese un bunita mensahe di motivashon pa tur trahadónan di SDKK. E mainta aki nos orador a para ketu riba e importansia di sa ku abo komo trahadó tin balor i ku bo trabounan desplegá tur dia na SDKK ta di sumamente di balor. Na e okashon aki tambe a hiba palabra direktor di SDKK, Sr. Floran i tambe Minister di Hustisia Sr. Girigorie ku tambe a enfoká riba e tema ariba menshoná. Tambe a rekonosé 3 kolega ku a kumpli 40 aña den servisio, i den kuadro pa sigui protehá pa COVID-19, tur trahadó a risibí un tapa boka di SDKK.
Finalmente tur kolega por a sosialisá i disfrutá huntu di un tremendo lùnch.
