Publiká riba 28 Novèmber 2024
Willemstad – Djasabra, 30 di novèmber awor, Archivo Nashonal di Kòrsou ta ofresé pueblo di Kòrsou un Dia Habrí pa por sera konosí ku su servisionan. Ta bai tin informashon i charlanan masha interesante tresé dor di ekspertonan i konosedó di e materia di preservá informashon pa medio di dokumentonan.
Esaki ta un oportunidat ku ta balapena presensiá. Archivo Nashonal di e ministerio di Gobernashon, Planifikashon i Servio Públiko ta organisá Dia Habrí un biaha pa aña ku e meta pa pueblo di Korsou haña e informashon tokante e servisionan di e instituto aki. Aki ta sigui e programa di e dia.
9:00 – 15:00. Eksposishon: KABEI
Kiko e delaster 160 aña di libertat a siña nos tokante nos kabei?
E eksposishon aki ta resultado di e koperashon entre studiantenan di Instituto Buena Bista i e skol di teatro hubenil Drazans.
9:00 – 10:00. Historia oral den kaya.
Un bista riba historia oral dor di brel di nos hóbennan lokal.
Den kuadro di desaroyo i modernisashon resientemente a digitalisá materialnan oudio. Produsí pa Prof. Dr. Rose-Mary Allen ku ta un investigadó – sientífiko.
Dosente Clay Toppenberg di Maris Stella MBO i huntu ku hóbennan di Maris Stella MBO a traha grabashonnan oudiovisual ku a wòrdu graba den forma di un “dramatic reading”.
E charla ta kuminsá ku un introdukshon di Prof. Dr. Rose-Mary i despues Sr. Clay Toppenberg lo duna un análisis kiko tabata e tarea pa e hobennan i pasa tres diferente vidionan di e dramatic reading
*E presentashon lo ta na Papiamentu i Hulandes
10:30 – 11:00. E publikashon: De slavenopstand van 1795 reimprimí
Na aña 1974 Dr. Jandi Paula, di felis memoria, a publiká un buki den kua a pone mayoria dokumentu relashoná ku e rebelion di katibu di aña 1795 disponibel pa investigashon. E buki a hunga un ròl importante pa investigashon sientífiko di e rebelion di 1795 i e ròl di Tula i en general den proseso di emansipashon di yu’i Kòrsou durante añanan 70-80.
Entretantu despues di kasi 50 aña e buki ta sold out.
Drs. Max Scriwanek hefe di Archivo Nashonal lo informá di e trabounan pa logra reimprimí e publikashon, ku lo ta riba merkado den e promé kuartal di 2025.
*E charla aki lo ta na Papiamentu
11.30 – 12.15. “Twee Generaties, Eén Missie” (Dos generashon, un mishon)
Dr. Leo Balai y Raul Balai huntu lo papia tokante e mishon pa dokumentá historianan i herensia skondí. Dr. Balai lo papia tokante e importansia di investigashon di archivo pa konservashon históriko i kon 2 generashon ta traha huntu pa registrá historia.
*E charla aki lo ta na Hulandes
13:00 – 14:00. Introdukshon i tepnan práktiko pa esnan ku ke kuminsá traha nan palu di famia.
Tin e persepshon ku na Archivo Nashonal públiko por yega i tuma su stamboom ku ta kla wardá p’e. Esaki no ta e kaso.
Lo duna un introdukshon tokante e fuentenan disponibel pa hasi investigashon pa yega na un stamboom, uso di nos website i tambe tepnan pa tene kuenta ku ne durante bo investigashon i eventual opstákulonan ku bo por topa durante bo investigashon dor di falta di informashon kontekstual. E charla aki ta spesialmente pa esnan ku nunka promé a yega di hasi investigashon di palu di famia.
Den e di dos parti di e presentashon (na Hulandes) Dr. Coen van Galen lo elaborá riba e proyekto “Historische Database van Suriname en Cariben. Van Galen lo duna un splikashon di e trabounan ku ta tumando lugá pa hasi e informashon ku ya ta disponibel mas aksesibel.
14:00 – 15:00. De vlucht van een groep Curaçaose slaafgemaakten met het schip de Wolf in 1841. (Huida for di Kòrsou di un grupo di persona sklabisá ku e barku De Wolf na 1841)
Na yüli 1841 diesnuebe persona sklabisá a logra skapa na un manera espektakular for di Kòrsou riba e barku “De Wolf”. Persiguí a traves di laman Karibe, nan a purba di haña libertat. Coen van Galen ta konta esaki durante e charla aki. Tabatin intentonan di huida for di Curaçao entre 1838 y 1862. Uzando e registro di huida di e esnan sklabisá, Van Galen ta mustra ken e personanan aki tabata.
*E charla aki lo ta na hulandes
