Notisia

Bishita di Minister S. van Heydoorn na skolnan di Fundeshi
Kolegio Iris Bruyning i Kolegio Monseigneur Willem Ellis

 

WILLEMSTAD – Dia 14 di mart ta dia Internashonal di matemátika i Minister di Enseñansa, Siensia, Kultura & Deporte (ESKD) sr. Sithree van Heydoorn, representantenan di Fundashon Nos tur ta konta sr. Ettienne Ijs i sra. Nohraya Jesurun i Sekretario-General di UNESCO Kòrsou sra. Marva Browne a bishitá 2 skol riba dia di matemátika. Vários skol tin aktividat e luna aki relashoná ku e materia di matemátika komo e luna aki tambe ta luna kaminda ta pone énfasis na e materia.

E bishita na e skol di fundeshi Kolegio Iris Bruyning a tuma lugá di 08.30 pa 10:00 kaminda e direktiva di e skol a reuní ku minister i a kombersá tokante di e aktividatnan na e skol. A kombersá riba e infrastruktura di e lokalidat ku mester di atenshon. Tambe a kombersá di e trayekto di digitalisashon na e skol i tambe a deliberá riba e hecho ku e skol tin un trayekto di “naschoolse opvang” ku ta yuda i karga e komunidat di e bario. Alumnonan i Dosentenan a kanta himno i himno di nan skol speshalmente pa e bishita di Minister. Despues minister a bishitá un grupo kaminda e dosente a duna e materia di matemátika di forma digital. A tuma nota ku alumnonan a partisipá ku hopi smak na momentu ku esaki ta tuma lugá di forma digital.

E bishita na e skol di fundeshi Kolegio Monseigneur Willem Ellis a tuma lugá e mesun dia di 11:00 pa 12:30. Na e skol aki e direktiva a tene un rekorido den tur e gruponan ku minister. Aki nan dosentenan dediká a prepará e lesnan di matemátika den grupo. Dosente i alumnonan tur a presentá e materia di matemátika ku ta kuarda ku e nivel di e grupo. A kombiná e materia di matemátika ku materia manera idioma pa mustra kon di forma innovativo i kreativo por duna dos materia den unu. Tambe na e skol aki nan ta hasi uso di digitalisashon den e gruponan. Alabes a splika ku e skol ta yuda e alumno traha riba su desaroyo personal i stimulá e alumno papia di forma positivo ku su mes usando un simpel spil ku frasenan ku ta lanta e outo-estima di e alumno.

Minister di ESKD sr. S. van Heydoorn a keda empreshoná di e forma kreativo ku e direktiva i dosentenan di tur dos skol ta duna e materia di matemátika di forma interaktivo na e alumnonan usando e instrumentonan digital ku ta disponibel. Por mira bèk riba un dia sumamente positivo i bunita kaminda e dosente i alumno a haña oportunidat pa topa ku minister den nan ambiente di skol.

Ministerio di ESKD ta sigui organisá e bishitanan aki durante e aña eskolar aki pa asina por duna atenshon dirihí i personal na kada skol.

—
KOMUNIKASHON
** riba e potrètnan athunto por tuma nota di bishita na e dos skolnan di fundeshi Kolegio Iris Bruyning i Kolegio Monseigneur Willem Ellis. Pa mas potrèt por bishitá página sosial di facebook aki:  Ministerio di ESKD.