Publiká riba 11 Yüni 2018
Willemstad – Tur aña riba 8 di yüni nos ta selebrá Dia Mundial di Oséano i su importansha pa bida i kon nos por proteh’é. Selebrando e dia aki ta yuda halsa apresio pa nos oséanonan i ta inspirá mas embolbimentu den konservashon di e fuente importante aki ku nos tur ta dependé di dje. “The Ocean Project” a promové i kordiná “World Oceans Day” mundialmente for di 2002. “The Ocean Project” ta un organisashon kolaborativo ku ta traha ku sientos di organisashon inkluyendo “World Ocean Network”. Tema di e aña aki pa Dia Mundial di Oséano ta: Prevení Polushon di Plèstik.
E tema di e aña aki ta similar na e tema di Dia Mundial di Medio Ambiente i esaki ta ilustrá e preokupashon mundial pa polushon di plèstik riba tera i den oséano. Aki na Kòrsou ya nos tur por a tuma nota di e diferente inisiativanan for di diferente organisashonnan pa atendé ku e problemátika di plèstik. Pero plèstik no ta e úniko fuente di polushon di nos kosta i laman.
Manera ta konosí na diferente parti di nos kosta ainda ta laga awa sushi di riol bai laman. Esaki ta afektá koral, bida marino i ta promové kondishonnan ku por kousa malesa serka hende. P’esei nos tin un reto grandi nos dilanti pa e añanan ku ta bini pa drecha i konstruí infrastruktura adekuá pa kanalisá tur awa di riol na plantanan di purifikashon pa tratamentu promé esaki bai laman. Tin ehersisionan kaba tumando lugá pa logra e meta aki. Nos instituto pa investigashon marino Carmabi den kolaborashon ku Ministerio di GMN tambe ta hasiendo investigashon riba un malesa ku ta afektando piskánan pa konfirmá orígen di e malesa ku lo por ta relatá na polushon bakteriológiko.
Ilustrashon di logo di “World Oceans Day 2018”.
