Publiká riba 09 Febrüari 2022
WILLEMSTAD – Na aña 2015, Gobièrnu di Kòrsou a dekretá 8 di febrüari komo Dia Nashonal di Lenga Materno. E dia a keda dekretá na honor di sr. Modesto Apostel (Chano) Margaretha (1911-1990). Historia ta konta ku e digno siudadano aki a tribi di papia nos idioma materno Papiamentu pa promé biaha na aña 1958 den sala di reunion di Konseho Insular. E tempu ei tur reunion tabata na Hulandes i no por a tene disertashon na Papiamentu. P’esei awe riba e dia aki a duna honor na sr. Modesto A. (Chano) Margaretha.
Vise-Presidente di Parlamento sra. Corinne Djaoen-Genaro a tene su disertashon den forma di un poema kaminda na final a para ketu na algun pregunta ku e ta hasi kada un di nos awe riba e dia importante aki. Minister di Enseñansa, Siensia, Kultura i Deporte (ESKD) sr. Sithree van Heydoorn den representashon di Gobièrnu a para ketu na e momentu históriko aki i elaborá riba e balor di nos idioma komo parti di nos identidat kolektivo komo nashon. Sr. Ephraim Cijntje den representashon di famia a hiba palabra i mustra riba e balor di nos idioma den komunidat.
Minister sr. Sithree van Heydoorn huntu ku kolaboradó di maneho sra. Irelnety Copra a rindi tributo dor di pone un krans na e graf. Despues Vise-Presidente di Parlamento kompañá pa Vise-Griffier sr. Trinidat tambe a pone krans na e graf i rindi tributo na Sr. Margaretha.
Na final di e seremonia Minister di ESKD sr. Sithree van Heydoorn a anunsiá na tur presente ku di e forma aki ta hasi inisio na e siklo di Idioma Papiamentu ku ta kore di 8 pa 21 di febrüari. Durante di e periodo aki ta bai pone énfasis riba nos Idioma Papiamentu i tambe lo tene un aktividat riba dia 21 di febrüari 2022 ku ta dia Internashonal di Lenga Materno.
—
KOMUNIKASHON
**riba potrèt athunto por tuma nota di e aktividat solèm. Pa mas potrèt por bishitá: Dia Nashonal di Lenga Materno: Papiamentu