Dies aña Tormenta Tropikal Tomas - Informashon tokante Gobièrnu di Kòrsou Bo opinion

Notisia

Dies aña Tormenta Tropikal Tomas

Geplaatst op 01 November 2020 dor di Ministerio Asuntunan General i Promé Minister

WILLEMSTAD – Dia 1 di novèmber a marka dies (10) aña ku e Tormenta Tropikal Tomas a pasa nort di Kòrsou. Den kuadro di esaki, e Direktorado di Kontrol di Riesgo i Maneho pa Kalamidat di Gobièrnu di Kòrsou ta reflehá riba e susesonan ku a marka e dia aki i ta kompartí teps i informashon kon Kòrsou por ta mihó prepará. 

E Organisashon di Kalamidat (Rampenbeheersingorganisatie) di Gobièrnu di Kòrsou tin komo tarea pa entre otro kordiná i mitigá e efektonan di kualke situashon di kalamidat ku menasá òf asotá nos isla. Na momentu ku a bira konosí ku Tormenta Tropikal Tomas tabata aserkando, e organisashon mesora a aktivá Kòrsou su Sentro Di Operashon di Emergensia (Emergency Operation Center (E.O.C). Den e Sentro di Operashon aki, e Organisashon di Kalamidat tin un total di nuebe (9) Emergency Support Functions (ESF’s) pa asistí den momentunan di kalamidat huntu ku organisashonnan manera e.o.  Polis, Brantwer, Ambulans, UTS, BT&P, WJZ, Aqualectra, Servisio di Obranan Públiko, Ministerio di SOAW, Direktorado di Komunikashon i Informashon, Ministerio di Hustisia, Warda Kosta, Meteo, Ministerio di GMN,  Krus Kòrá  i boluntarionan di E.O.C. tabata presente.  

Dia 1 di novèmber 2010, e tim di kalamidat kompletu a enfoká tur e ekipo su forsa i konosementu pa manehá i mitigá mas tantu posibel e efektonan di Tormenta Tropikal Tomas na Kòrsou i salbaguardiá bida di hende. Esaki sin mas, a rekerí un esfuerso imenso i na sierto grado asta peligroso. Lamentablemente durante e operashon aki, un boluntario di CITRO, Sr. Robert Willems, a pèrdè su bida trágikamente durante di un akshon di reskate di personanan ku mester a ser reskatá for di un edifisio inundá.

Tormenta Tropikal Tomas a habri nos wowo riba diferente aspekto importante ku mester a mehorá. Por ehèmpel, aspektonan di mehorashon ku a keda implementá den nos Servisio Meteorológiko. Aparte di esaki, Gobièrnu di Kòrsou a traha tambe riba mehorashon di e Organisashon di Kalamidat dor di entre otro: 

  • instituí e Direktorado di Kontrol di Riesgo i Maneho pa Kalamidat. 
    E direktorado aki ta duna atenshon na tur lokual mester pa garantisá i salbaguardiá na un manera efektivo i efisiente, bida, kontinuidat sosial, medio ambiente i bienes di pais Kòrsou, promé, durante i despues di un krísis òf kalamidat 
  •  traha un profil di riesgo pa Kòrsou (Risicoprofiel) kaminda tin identifiká 35 potensial riesgo ku por asotá Kòrsou i kiko ta e probabilidat ku esaki por sosodé
  •  hasi adaptashon i desaroyo di e leinan di Landsverordening Crisisbeheersing, Rampenbestrijding i Uitzonderingstoestand huntu ku WJZ
  • adaptá i mehora e diferente plannan di kalamidat ku Kòrsou tin
  • organisá diferente lès, seminario, training i ehersisio pa miembronan di e organisashon di kalamidat. Kaminda riba un forma multidisiplinario miembronan di e organisashon di kalamidat por trein situashonnan di krísis o kalamidat ku por tuma lugá, pa asina mitiga e efektonan di esakinan
  • mehora e suministro di informashon pa ku públiko hasiendo  uzo di: e website www.kalamidat.cw , e app ‘Kalamidat’ ku por download grátis den App Store òf Play Store, organisá diferente charla i presentashon pa públiko. E mensahe di komunikashon awor ta enfoká riba preparashon pa un posibel krísis o kalamidat

E Direktorado di Kontrol di Riesgo i Maneho pa Kalamidat ta sigui traha i mehorá kontinuamente pa asina Kòrsou ta mihó prepará den kaso di un kalamidat. Tumando na kuenta ku ainda nos ta den temporada di orkan, e Direktorado ta urgi tur siudadano pa:

  1. Sòru di tin un plan di kalamidat na kas pa den kaso di un menasa di orkan; 
  2. Kontrolá ekiponan di emergensia i ekiponan ku ta usa bateria manera radio, flèshlait i telefòn selular. Sòru semper pa èkstra bateria; 
  3. Sòru pa kuminda ku no ta daña i sufisiente awa pa bebe (3 lìter pa persona pa dia) pa 3 dia; 
  4.  Kòrta palu i mata rondó di kas i limpia bo kura ya ku takinan ku ta bula rònt por kousa daño na bo kas. 

Pa mas informashon pa ku preparashon pa temporada di orkan por bishita:

www.gobiernu.cw

www.kalamidat.cw

www.meteo.cw

 

Ministerio konserní