Publiká riba 27 Desèmber 2022
Willemstad – Minister Charles Cooper, huntu ku tim multidisiplinario di Prekario Karnaval, ta duna diferente informe pa loke ta prekario.
Registrashon pa sita
Klientenan ku ta deseá na traha un sita por registrá, via di un link den nan email, debí ku esaki ta algu ku e kliente mes por hasi digital. Tur kliente eksistente ta risibí un email outomatiko ku un invitashon pa registrá.
Metodo di pago
Por hasi pago via di un transferensha riba un number di kuenta, òf por SWIPE na momento di tuma e pèrmit. SWIPE ta posibel uníkamente ku tarheta di debito. No ta aseptá niun tipo di tarheta di kredito.
Identifikashon
Na momento ku e kliente ta bin pa su sita, ta pidi pa e bin ku un kopia di su sedula òf reibeweis bálido.
Último dia pa registrá i paga pa stènt
Último dia pa registrashon i pago di stènt ta 4 di yanüari 2023. Esaki ta tuma lugá na Ofisina di ROP na Plasa Horacio Hoyer entre 8or di mainta pa 11or di mainta. Esaki por tuma lugá sin sita.
Último dia pa registrá i paga pa stellage
Último dia pa registrashon i pago di stellage ta 17 di yanüari 2023. Esaki ta tuma lugá na SAMBIL, den ofisina di FDKK. Ta kuminsá for 9or di mainta pa 7or di anochi. Esaki por tuma lugá sin sita.
Kliente ku a registrá, pero falta paga
Tur kliente ku a registrá kaba pero falta di hasi pago, por pasa na ofisina entre 5 di yanüari 2023 pa 17 di yanüari 2023 pa hasi pago.
Será dia 30 di desèmber!
Riba djabièrnè, 30 di desèmber 2022, ofisina di prekario ta sera henter dia.
Habri bèk
Pa kliente di stènt, ofisina di prekario ta habri dia 3 i 4 di yanüari 2023, entre 8or di mainta pa 11or di mainta na ROP na Plasa Horacio Hoyer 19.
Pa tur kliente ku stellage, ta habri bèk dia entre 5 yanüari 2023 te ku 17 yanüari 2023, únikamente na SAMBIL, den ofisina di FDKK.
Link pa inskripshon pa bin na remarke pa un prekario
Pa inskripshon pa Prekario Karnaval 2023, ta bai habri un link riba e página di Facebook: Prekario Karnaval, i riba e página di Facebook di Ministerio di Trafiko, Transporte i Planifikashon Urbano.
Esaki ta habri entre 2 di yanüari 2023, for di 8or di mainta i lo keda habri pa inskripshon te ku 13 yanüari 2023.
Kliente nobo
Na momento ku tim di Prekario Karnaval 2023, terminá ku registrashon di tur kliente eksistente, tim di prekario lo tuma kontakto ku e klientenan nobo ku a ser skohé dor di e sistema digital. Esaki lo ta dependiendo di e kantidat di lugá ku keda disponibel riba e ruta di Karnaval 2023.
Informashon di kontakto
Ofisina di Tim Prekario Karnaval 2023 ta alkansabel via e number nan 5122822 i 5113874. Por manda e-mail na info@prekariocuracao.com. Por bishitá e página di facebook: Prekario Kòrsou.
