Publiká riba 22 Òktober 2018
Willemstad – Despues di e fase di preparashon, awor ta kuminsá e fase di ehekushon di proyektonan di mantenshon di kaminda. Mayoria proyekto ta bai kuminsá den e siman di 22 di òktober benidero. E proyektonan ku ta bai kuminsá ta entre otro: Diamantenweg, Bocaweg i Suffisantweg.
Bocaweg i Suffisantweg ta proyektonan di durashon largu, Diamantenweg ku lo terminá relativamente mas lihé. Pa tur informashon di proyektonan individual por bishita e website www.vvrp.cw/proyekto.
OW ta hasi un apelashon na komunidat pa sali kas mas trempan, tene pasenshi riba kaminda, hasi uso di rutanan alternativo, sigui bòrchinan di indikashon, i tene kuenta ku trahadónan riba kaya. Di e forma aki, nos tur ta keda kontentu riba kaminda!
Mirando e situashon finansiero di pais, no por hasi tur kaminda na Kòrsou pareu. A skohe esakinan pa e aña aki ainda, i den 2019 ta sigui ku mas.
OW ta traha huntu ku Departamentu di tráfiko di Kuerpo Polisial (KPC) pa yega na rutanan alternativo. Tambe ta sòru pa habitantenan i komersiantenan keda ku akseso na nan kas òf negoshi. OW i KPC ta pidi tur outomobilista pa sigui e indikashonnan i kore ku koutela. OW ta gradisí pueblo di Kòrsou adelantá pa e pasenshi i koperashon.
Pa pregunta por yama òf whats app na 511-8582. Tambe por bishita e website www.vvrp.cw/proyekto pa tur informashon i desaroyo di proyektonan di OW.
