E punto di salida tabata ku: “Kada mucha, hóben i adulto na Kòrsou mester tin akseso di forma igual na enseñansa di kalidat i fasilidatnan edukativo pa desaroyá nan mes kompletamente i integralmente”. Pa realisá esaki, ministerio di ESKD mester ta mas enfoká riba informashon i dato di manera ku e ta funshoná basá riba uzo di dato di forma integral i digital. Seguidamente, digitalisashon den enseñansa ta rekerí un kolaborashon amplio, bon pensá i di forma integrá entre tur organisashon involukrá den enseñansa, manera direktivanan di skol, mayornan, organisashonnan di enseñansa, empresa i gobièrnu.
E programa di DOC a kuminsá na final di aña 2021. A bin komprondé ku e fondonan disponibel no tabata sufisiente pa finalisá tur e trabounan den e fase aki debidamente. For di e tempu ei, Ministerio di ESKD a kuminsá hasi e ehersisionan finansiero nesesario pa por haña posibel fondonan pa por kanalisá i ehekutá e fase konforme tur e trabounan palabrá. Pa kontinuidat di e programa di DOC, ta hopi importante pa e fondonan finansiero pa e programa ta disponibel di manera struktural i duradero.
Den e kuadro aki a tene riba 3 di yüli último, un presentashon na Sekretario di Estado enkargá ku Asuntunan Interno i Relashonnan den Reino, Sra. Alexandra van Huffelen, tokante e progreso di implementashon di e sinku áreanan di maneho ku a sali for di e rekomendashonnan di e rapòrt “Nulmeting” i e Plan di akshon di DOC. Relashoná ku esaki Sekretario di Estado sr. A. Van Huffelen a indiká na Minister di ESKD ku por wak posibilidat pa finansiamentu for di e fondonan di ‘Nationaal Groeifonds’ (NGF) di Hulanda.
Partikularmente, NGF ta bai keda habrí pa e paisnan Aruba, Kòrsou i Sint Maarten te ora ku modalidatnan di e implementashon keda detayá. Den e kuadro aki Minister di ESKD a tuma e desishon resientemente pa ofresé e programa DOC na Konseho di Minister pa inkluí e programa riba e agènda di implementashon pa e di kuater kuartal di e aña aki. Na momentu ku e fondonan di NGF bira aksesibel lo entregá un petishon di finansiamentu na e organisashon di NGF den konkordansia ku tur e paisnan Karibense den Reino.
—
KOMUNIKASHON
