Notisia

WILLEMSTAD – Ministerio di Enseñansa, Siensia, Kultura & Deporte (ESKD) den estrecho koperashon ku Departamento di Enseñansa di Aruba a tene un siman kompletu di Disiplina Konsiente. Durante di e siman di 18 ougùstùs pa 24 ougùstùs a tene seshon di profundisashon, tayer i un konferensia pa diferente stakeholder di e ministerio di ESKD. Minister di Enseñansa, Siensia, Kultura & Deporte sr. Sithree van Heydoorn a partisipá di forma virtual na e konferensia i tambe a konta ku presensia relámpago di Minister di Finansa sr. Javier Silvania.

Direktornan di skol  ku a partisipá aña pasá a haña oportunidat pa profundisá den e metodologia. Un grupo nobo di personal di skol di fundeshi, skol speshal di fundeshi, fundashonnan di Edukashon, institutonan pre-eskolar, kultural i deportivo tambe a partisipá den un tayer di dos dia i alabes a tene un konferensia di Disiplina Konsiente pa personal di ministerio di ESKD i direktivanan di Skol. E siman a keda organisá pa e tim i grupo di trabou di Disiplina Konsiente huntu ku dos treiner sertifiká di Disiplina Konsiente di Aruba den persona di sra. Regina L.S. De Kort isra. Vanessa R. Tromp akompañá pa ko-fasilitadónan sra. Sharline L. Rodriguez i sra. Shaska I. Kock.

Conscious Discipline na papiamentu “Disiplina Konsiente” ta un aserkamentu transformashonal, ku ta kuminsá serka adulto promé, den kua e persona konserní ta desaroyá shete (7) abilidat ku e meta pa logra regulashon propio ‘riba tereno  sosial emoshonal. E intenshon ta pa despues e adulto aki guia e hóben pa desaroyá mesun abilidatnan pa na su turno e hóben tambe siña regulá su mes ‘riba tereno sosial i emoshonal. E trayekto aki ta enserá un proyekto kaminda ta bai traha den estrecho koperashon ku tur ‘stakeholder’ konserní. Huntu ta bai traha pa yega na un struktura kaminda ta bai apliká e metodologia aki den henter e ministerio i spesialmente pa e profeshonalnan di skol pré-eskolar, enseñansa di fundeshi regular i spesial i kuido despues di skol (naschoolse opvang) ku ta traha ku nos muchanan di 0 te ku 14 aña.

Pa hasi e trayekto mas duradero i partisipativo, Sekretario-Generaal sra. Susan Larmonie-van Heydoorn na nòmber di Minister di ESKD, a hasi entrega di e material di forma simbóliko na un representashon di e diferente stakeholdernan ku a partisipá na e dos dianan di e tayer. Por mira bèk riba un siman éksitoso i por tin sigur ku e trayekto di Disiplina Konsiente Kòrsou a ranka sali di forma positivo i ku partisipantenan komprometé pa sigui traha ku e metodologia aki.

** Riba e potrètnan athunto por tuma nota di varios di e aktividatnan. Pa un relato fotográfiko por bishitá: Disiplina Konsiente Kòrsou