Diskurso di Gobernador di Kòrsou señora Lucille George-Wout na selebrashon di Pasku, desèmber 2020 - Informashon tokante Gobièrnu di Kòrsou Bo opinion

Notisia

Diskurso di Gobernador di Kòrsou señora Lucille George-Wout na selebrashon di Pasku, desèmber 2020

Geplaatst op 25 December 2020 dor di Ministerio Asuntunan General i Promé Minister

Kerido Pueblo,

Mi ta kuminsá e diskurso di Pasku akí ku un suspiro. Un suspiro pasobra mi tambe a sinti mi desanimá meskos ku tantu hende na asina tantu momentu
durante e aña akí ku ta kabando. Pero ei mes, e suspiro ta unu di alivio tambe. Kada bes hende ta haña un mihó bista di un vakuna kontra e vírùs di korona. I e delaster dianan akí e kontagio na nos isla ta birando ménos. Pues, ta motibu pa sierto trankilidat. Un vakuna ta pèrmití nos reanudá bida manera nos a konos’é promé ku e pandemia. Pero esei no ta nifiká ku nos a yega kaba kaminda nos ke ta. Te ainda nos tin di anda ku koutela i nos lo tin di sigui tene sufisiente kuenta ku otro.

E vírùs akí a afektá tur tur hende. Sea ta debí na enfermedat, sea ta ku hende a pèrdè trabou, sea ta pasobra bo ta sinti soledat òf ta pasobra e krísis akí a limitá nos libertat …, nos tur el a gòlpia duru i direktamente. Nos bida di tur dia a kambia for di dia a konstatá e promé infekshonnan di korona na mart na nos isla.

I awor pa Pasku, ta un kos so nos ke. Nos ke ta huntu, reflekshoná riba loke a pasa i loke ta na kaminda. Hari huntu, kome huntu i pasa man riba skouder di un hende ku tin nesesidat di e atenshon akí. Anto nèt awor no por i … esei ta hasi doló. For di e lugá akí mi ke manda pa tur hende ku a pèrdè un ser kerí hopi amor i konsuelo. E pèrdida ta muchu mas pisá awor komo nos no por tuma despedida manera ta nos kustumber. Meskos ku masha hopi yu di e tera akí, mi pensamentu i mi kurason ta ku boso.

Si nos a siña algu di e aña akí … anto ta kon importante ta pa sinti bo apoyá i no solitario. Forma parti di un totalidat mas grandi, sea ta di un famia, un kor di iglesia, un bario òf un klup deportivo, importante ta si nos por kompartí i risibí sosten ora tempu ta delegá i difísil. E aña akí nos a reflekshoná adekuadamente tambe riba e echo ku 10 aña pasá nos a bira un pais autonomo den Reino. Komo pais tambe nos a eksperensiá kiko ta nifiká ser parti di un totalidat mas amplio. Nos a risibí yudansa di Reino di forma diverso. Yudansa ku kuminda i apoyo finansiero pero a kompartí ku nos tambe eksperensia riba tereno di salú i edukashon na un momentu ku nos tabatin tantu nesesidat di esakinan, i na un momentu ku nos partnernan den Reino tambe tabata sufriendo pa motibu di e pandemia. Te ainda servisionan nashonal manera polis, wardakosta i hòspitalnan ta trahando estrechamente ku otro i ku e unidatnan di servisio stashoná na e otro partinan di Reino.

Afortunadamente e kooperashon ei ta bayendo bon. Sin embargo, tin hopi kos di hasi ainda. Nos Reino ta un poseshon presioso i fuerte ku mester por wanta sierto sla. E aña akí nos a nota ku esaki ta e kaso tambe. E yudansa ku komo miembronan di Reino nos ta risibi di otro ta boluntario pero no sin obligashon, i ta asina mester ta tambe. Huntu nos lo duna tur ku tin pa konstrukshon i rekuperashon di Kòrsou. Nos gobièrnu tambe ta bon konsiente di e echo akí. Gobièrnu a demostrá e aña akí kiko ta nifiká goberná, esta … asumí responsabilidat na momentu ku esei ta mas nesesario ku nunka. Semper bai ku interes di pueblo na promé lugá.

Último lunanan a duna atenshon na diferente grupo den nos komunidat ku e krísis i e medidanan a afektá. Ta di komprendé i ku rason. Tin apresio i
preokupashon pa nos personal di kuido ku ta presta di un forma eksepshonal; tin atmirashon i gratitut pa asina tantu boluntario ku den un periodo kòrtiku a logra mobilisá e partimentu di alimento, loke te ainda ta tumando lugá. Tin preokupashon tambe pa empresarionan den ‘horeca’ ku ta mira kon nan negoshi ku nan a lanta ku tantu dedikashon ta kore peliger i pa nos músikonan ku ta duna un kontribushon enorme na e ambiente animá pa kua Kòrsou ta famá te mas ayá di nos fronteranan.

Lo mi ke dirigí mi partikularmente tambe na dos otro grupo ku ta di masha importansia pa futuro konstrukshon i rekuperashon di Kòrsou. Ta trata di nos muchanan i nos hóbennan. Muchanan stimá, pa boso tambe e aña akí a kana otro for di loke boso a ferwagt. Hopi di boso mester a pèrdè lès di skol. Ketu ketu mi ta komprendé ku esaki ta emoshonante i dibertido pa un par di dia. Pero despues di tempu bo ta sinti falta di bo amiguitunan i kisas asta di bo yùfrou i mener di skol. No ta selebrá hasiment’i aña manera kustumber, no ta bai hunga serka otro hopi mas i posiblemente na kas ta ménos gezellig tambe.

Meskos ta konta pa nos hóbennan; den un tempu ku boso mester ta deskubriendo mundu, yen di gana di topa otro, ta pidi boso pa no hasi nèt esei. Durante gran parti di aña eskolar, obligatoriamente boso mester a studia muchu mas independientemente ku boso ta kustumbrá, i salimentu anochi a
keda restringí. Podisé boso tambe a sinti boso abatí meskos ku mi. Pasobra kiko hende por hasi den un mundu kaminda tur kos ta mustra asina insigur? Awor … ta oké pa hende sinti nan insigur òf sinti miedu. Nos tur konosé e eksperensia ei. I tòg … , wak rònt ‘i bo; semper lo tin un hende di konfiansa ku lo ke skucha bo, un hende pa bo por stèns riba dje. Kompartí bo eksperensianan, bo inkietutnan ku bo mayornan òf un otro hende ku bo ta konfia. Esei hopi bia ta yuda mashá.

Mayor parti di aña boso a tende e mes kansion i awor atrobe nos ta pidi ku urgensia pa boso sigui kumpli ku e medidanan di seguridat na vigor.
Kerido muchanan, kerido hóbennan, boso kompromiso tambe ta di importansia pa supera e krísis akí. Keda kòrda esaki. Mihó ku nos ku ta hende grandi, boso por inventá loke sí por den e tempu akí, i di ki forma por pasa sintimentu kaluroso i manda lus pa otro. P’esei e aña akí m’a laga iluminá Palasio di Gobernador ku èkstra lus, komo símbolo di speransa pa un aña nobo mihó!

Estimado Pueblo di Kòrsou,

Mi esposo Herman ku mi, ta deseá abo i bo sernan kerí un Felis Pasku i un Próspero Aña Nobo. Sigui presta hopi atenshon na otro i kuida otro na 2021. Ban hasi di e aña nobo akí HUNTU…, un tremendo aña.

Ministerio konserní