DISKURSO DI GOBERNADOR NA HURAMENTU DI GABINETE PISAS - Informashon tokante Gobièrnu di Kòrsou Bo opinion

Notisia

DISKURSO DI GOBERNADOR NA HURAMENTU DI GABINETE PISAS

Geplaatst op 14 June 2021 dor di Ministerio Asuntunan General i Promé Minister

Djaluna, 14 di yüni 2021  

Su Ekselensianan,

For di awor boso tur akí ta minister di tur Yu di Kòrsou!

Tin un enkargo pisá ta warda boso. Pasobra awor boso ta bai kuminsá ku e gran tarea di goberná Pais bou di sirkunstansianan eksepshonalmente difísil. Afortunadamente, krísis di Corona na Kòrsou ta parse un poko kontrolá pero esei no ta nifiká ku nos por sigui ku nos bida manera kustumber. I laga nos ta franko. Pa masha hopi hende, promé ku Corona mes  bida no tabata fásil.

Stankamentu di ekonomia di nos pais aña pasá a oumentá desbentaha ekonómiko di hopi hende muchu mas ainda. Nos lo mester hasi un tremendo esfuerso pa gana nos ekonomia riba pia  atrobe i ofresé nos hendenan perspektiva nobo. Nos tur tin mashá mesté di esaki.

E nesesidatnan sosial ta enorme i nan ta eksigí akshon urgente den tur sektor di komunidat; di kuido te enseñansa; di ekonomia te infrastruktura; di desaroyo sosial te finansa i di hustisia te gobernashon. Nos komunidat tin nesesidat di impulso nobo i di areglonan pa yega na desaroyá i hasi pleno uso di e talentonan disponibel. Pasobra di ku tin talento den e komunidat akí di nos, mi ta konvensí. Ta e oportunidat nan tin ku haña pa den un sosiedat sigur i stimulante nan desaroyá.

Esei ta rekerí kooperashon ku tur e sekshon- i organisashonnan di pais; i tambe konsultanan konstruktivo ku nos sosionan denter di Reino. Ta nifiká ku nos mester traha a base di konfiansa mutuo; tantu den Kòrsou entre sosionan polítiko i sosial, komo entre partnernan denter di Reino i na nivel internashonal. E konfiansa ei lo mester krese i e konfiansa ei boso lo mester gana, a base di boso esfuerso i loke efektivamente boso presta!

Ta dependé di boso, komo Konseho di Minister, pa tuma inisiativa i indiká e ruta pa sali for di e krísis. Esei ta rekerí plania i tuma desishonnan ku ta prepará kuidadosamente den konsulta ku tur e partinan involukrá, teniendo na kuenta e rekisitonan di bon gobernashon i responsabilidat atministrativo di kada hende personalmente. Antó e plannan i e desishonnan ei mester ta basá riba un evaluashon realístiko di nos situashon i nos posibilidatnan. Esei ta e reto  boso dilanti.

Pero boso no ta so …  semper kaminda ta posibel lo mi apoyá boso. Esei ta mi papel komo Gobernador; pa duna boso aliento, pa duna konseho i – kaminda ta nesesario – duna atvertensia.

Título di boso akuerdo di gobernashon ta: Un Gobernashon di Pueblo, pa Pueblo i huntu ku Pueblo di Kòrsou, Ta pueblo su bùrt! Klaramente boso ta duna di konosé kiko ta boso afan pa hasi den e kuater añanan benidero. Mi ta ekspresá e deseo ku efektivamente boso lo kumpli ku boso meta. Siudadanonan di Kòrsou ta konta ku boso!

Ministerio konserní