Diskurso di Minister di ESKD sr. S.van Heydoorn - Informashon tokante Gobièrnu di Kòrsou

Notisia

Ministerio konserní Enseñansa, Siensia, Kultura & Deporte
 

Diskurso di Minister di ESKD sr. S.van Heydoorn

Publiká riba 19 Desèmber 2022

Diskurso di Minister di Enseñansa, Siensia, Kultura & Deporte Sr. Sithree van Heydoorn riba dia 19 desèmber 2022 kaminda Gobièrnu Hulandes ta duna reakshon riba rapòrt Kadena di Pasado.

Pueblo di Kòrsou, mi ta satisfecho, pasobra porfin awe 1537 dia despues ku komunidat sivil di Kòrsou, a base di sentensia di un huisio popular riba 3 di òktober 2019, hues a disidí ku estado Hulandes tambe mester asumí su responsabilidat pa rehabilitá nos héroe nashonal Tula.
Hulanda ta honra e sentido di hustisia di komunidat sivil di Kòrsou i ta deklará ofisialmente ku e ta rehabilitá Tula.

Gobiernu Hulandes a deklará tambe pa huntu ku nos di Kòrsou desaroyá i prepará un símbolo visibel i duradero pa marka ku Tula no solamente ta nos héroe nashonal pero ku TULA ta inspirashon pa progreso i emansipashon di Kòrsou. Un fuente di inspirashon pa kada yu di Kòrsou kumpli ku su deber patriótiko i traha duru pa desaroyá e kultura di resistensia i e kultura di lucha ku ta nesesario pa Kòrsou por progresá den su proseso di emansipashon. Mi ta kontentu pasobra awor nos héroe nashonal Tula, berdaderamente por keda usa komo modelo di inspirashon pa nos hóbennan den e proseso di formashon, edukashon i enseñansa.

Pa realisashon di mi vishon pa loke ta trata mehorashon di enseñansa i edukashon esaki ta sumamente importante. Ta konosí ku mi deseo ferviente ta, pa huntu nos mobilisá tur nos esfuerso pa identifiká i implementá e mehorashonnan nesesario den nos enseñansa i edukashon. E mehorashon di nos enseñansa i edukashon mester resultá den un kontribushon berdadero pa desaroyá nos pais Kòrsou.

Kumpliendo ku e enkargo noble i emansipatorio ku mi tin komo minister di Enseñansa, Siensia, Kultura i Deporte e rehabilitashon di TULA, ta un kontribushon balioso pa por realista e vishon holístiko riba e “kontribushon krusial di enseñansa, siensia, kultura i deporte pa desaroyo i progreso di nos nashon Kòrsou”.

  • Den kuadro di esaki ya mi a duna enkargo:
    • pa konopá nos kultura ku e resistensia i lucha di Tula i su kompañeronan, pa un mihó bida den libertat, a base di igualdat i solidaridat;
    • pa halsa nos kultura na e manera di anda, pa sali na defensa di nos derechinan, nos propio interes i tambe e manera pa lucha pa mas i mihó bienestar;
    • pa traspasá e informashon, e noshon, e konosementu i e konsiensia pa nos desaroyá e identidat kolektivo ku ta nesesario pa Kòrsou por progresá i emansipá.
  • Tambe ya mi a duna enkargo na sektor di Kultura i Deporte, sektor di enseñansa di mi ministerio pa uni forsa ku tur ku ta envolví pa;
    1. pa pèrkurá ku kada aña riba 10 di desèmber, komo dia di derechinan Humano, skolnan di Kòrsou mester dediká atenshon na balorashon di e derechinan Humano fundamental i
    2. pa entamá e proseso edukativo pa desaroyá serka nos hóbennan di Kòrsou e kultura di resistensia i e kultura di lucha ku ta nesesario pa Kòrsou por progresá den su proseso di emansipashon

Ku rehabilitashon di Tula nos ta eliminá un opstákulo sikológiko den realisashon di mi vishon pa mehorashon di enseñansa i edukashon mi por bisa tambe di ta hopi satisfecho ku e logro aki. Rehabilitashon di Tula ta un demonstrashon ku e esfuersonan i akshonnan di komunidat sivil di Kòrsou i di siudadanonan aktivo di Kòrsou ta kondusí na avansenan real den e proseso largu di emansipashon. Pa asina libra nos di e gara di sklabitut mental ku tin nos stroba den nos esfuersonan pa yega na e desaroyo apropiá di e suidadano di Kòrsou i di nos nashon Kòrsou.

Mi ta satisfecho tambe pasobra un bes mas a keda demonstrá ku e apelashon ku mi a hasi riba 17 di ougùstùs 2021 den e mesun parke aki di lucha pa libertat aki tin sentido.
▪ E dia ey mi a enfatisá ku “Intenshonalmente gobièrnu di Kòrsou a skohe pa e fecha di 17 di ougùstùs i no pa e fecha di 1 di yüli pa asina enfatisá e importansia i deber patriótiko di kada yu di Kòrsou pa nunka NO entrega i aseptá situashonnan di inhustisia, di deshumanisashon, di desigualdat i di supordinashon, pero pa usa e lucha emansipatorio ku TULA i su kompañeronan a inisiá riba 17 di ougùstùs komo ehèmpel i fuente di inspirashon pa lucha i sigui lucha pa libertat, igualdat, solidaridat i dignidat humano.”
▪ E dia ei mi a enfatisá tambe ku “Gobièrnu di Kòrsou 38 aña pasa a yega na e desishon inteligente, patriotiko i emansipatorio akí komo kulminashon di e lucha i akshon di añanan largu di gruponan sosial pa libra nos di e yugo pisa di sklabitut mental i pa konsientisá pueblo di Kòrsou di e berdadero karakter polítiko di e lucha di nos héroe nashonal TULA.
▪ Públikamente e dia ei mi a yama e gruponan sosial hopi danki i a hasi un apelashon riba nan pa sigui lucha realisando ku no ta tur ora esaki ta kondusí na e viktoria final mesora, pero ku mester perseverá, balorá i apresiá kada adelanto lográ a base di lucha.

E logro di awe ta un prueba mas di esaki i p’esei mi kier yama komunidat sivil danki i enkurashá nan pa sigui lucha pa un dia nos tur por kanta : “ Tula bo tin nodi di warda mas………”

Alabes nos ta spera ku e dia di awe tambe lo habri porta pa un relashon den reino, kaminda ta respetá nos outonomia, nos Parlamento i Gobièrnu di Kòrsou.
Kaminda nunka mas nos lo por pensa pa bin ku konstrukshon nan i/òf leinan di konsenso ku ta mina nos outoridat.


Sr. Sithree van Heydoorn
Minister di Enseñansa, Siensia, Kultura & Deport

Pa mas potrèt di e seremonia na Lucha pa Libertat riba dia 19 desèmber 2022 bishitá aki: Seremonia 19 – 12 – 2022