Diskurso di Minister President na Konmemorashon 4 mei 2020 - Informashon tokante Gobièrnu di Kòrsou Bo opinion

Notisia

Diskurso di Minister President na Konmemorashon 4 mei 2020

Geplaatst op 18 May 2020 dor di Ministerio Asuntunan General i Promé Minister

Diskurso konmemorashon 4 di mei 2020

Sr. Eugene Rhuggenaath MBA/MBI

Minister President di Kòrsou
na okashon di konmemorashon di 75 aña libertat

Konmemorashon di esnan ku a kai den guera. Dodenherdenking

Gobièrnu di Kòrsou a konmemorá i duna rèspèt na víktimanan ku a pèrdè nan bida den diferente guera i mishonnan di pas, den forma di buta krans na e monumento di Guera na Waaigat 4 di mei 2020. Ku presensia di entre otro Gobernador sra. Lucille George-Wout i Promé Minister di Kòrsou Eugene Rhuggenaath, a para ketu na 75 aña di libertat despues di okupashon di Oropa durante Segundo Guera Mundial.

Posted by Gobièrnu di Kòrsou on Wednesday, 6 May 2020

Ekselensia, Commandant, tur suidadano ku ta sigui nos na kas,

Di un manera diferente i sobrio, nos ta bini huntu awe den henter Reino Hulandes, pa para ketu na 75 aña di libertat, despues di okupashon di Oropa durante Segundo Guera Mundial.

Aña pasá riba e mesun fecha aki nos a kontemplá kon hopi bia bibando den un pais demokrátiko, nos ta asumí ku libertat ta un echo. Nos ta biba for di e prinsipio ku nos tur ta liber i por djis asumí esei komo nos realidat …‘e ta di mes’. Den nos bida diario aki na Kòrsou, tiki bia nos ta para ketu na kon nos ta biba òf keda sin biba nos libertat.

Te ora e libertat ei ser ranká, kitá for di nos. Manera a pasa mas ku 80 aña pasá ora fasismo kier a konkistá Oropa i otro partinan di mundu. Miles di hende a bira presu den nan mes kas. Miones di hende a pèrdè nan bida, pasó un tirano a disidí ku nan bida ta bal menos dor di nan religion, kultura, aparensia òf preferensia. Un generashon di persona a mira nan soñonan bai pèrdí i te awe, di generashon pa generashon, nos ta para ketu na e lèsnan di periodo aki, pa nunka mas historia no ripití.

‘Fast-forward’ na aña 2020, e balor imenso di libertat un biaha mas ta keda eksperiensiá dor di suidananonan rònt mundu, inkluso aki na Kòrsou, ora esaki keda restringí pa motibu di un virùs mortal COVID-19. Den ùltimo 7 simannan, komo Gobièrnu nos a haña nos ta deklará un estado di emergensia i tuma medidanan sin presedente, manera un toke de keda, pa ordená nos hendenan pa keda den kas. Nos mester a limitá libertat di moveshon, di por rekreá, di por traha i proveé pa nesesidatnan básiko manera kuminda. Tabata i ta sumamente difisil tuma e desishonnan aki, desishonnan ku nunka nos lo a imaginá di mester tuma, netamente paso nos sa kon sagrado e prinsipio di libertat ta. Pero den e eksperiensiá aki, ku miles di hende rònt mundu tambe mester a biba, tin un lès pa nos reflehá riba dje. Esei ta pa kòrda nos ku libertat ta un kousa komun, un responsabilidat kolektivo.

Pa nos por protehá otro su bida i otro su libertat, nos tur a haña nos ta entregá di nos temporalmente. Ki grandi tabata pa mira kon nos suidadanonan a tuma e responsabilidat ei riba nan. No solamente pasó Gobièrnu ta ordená esaki, pero paso komo ko-suidadano, komo bisiña, nos a komprondé kiko ta nifiká biba den un komunidat liber i tin un kontrato sosial ku otro. Laga nos reflehá awe riba e sakrifisio aki.

Nos a entregá un parti di nos libertat, no pa kapricho di poder òf maldat, pero pa bienestar general. Nos a entregá un parti di nos libertat, pa protehá nos kada un su derechi di bida i felisidat.  Nos a entregá un parti di nos libertat, paso nos sá ku nos libertat i bienestar ta mará na esun di e otro.

Na ingles tin un sita ta bisa “Freedom is earned”. I den palabranan di William Faulkner “We must be free not because we claim freedom, but because we practice it”. Dor di mustra konvikshon pa kombibí, respetá i asta lucha pa e otro su bida i libertat, nos ta honra esnan ku a bringa pa nos libertat durante dékadanan. Pues awe mi kier dediká e momentu aki na tur nos heroenan, algun ku nan nòmber ta inskribí riba e monumento aki. Esnan ku a bai nos dilanti, a lucha i ofresé nan bida pa nos libertat. Tambe esnan ku ta luchando pa nos bida i libertat den presente. Pero mi kier dediká e dia aki tambe na Pueblo di Kòrsou en general. Laga nos apresiá i biba e balor di ta liber i kòrda e lèsnan di pasado i presente. Laga nos sigui kumpli ku e responsabilidat kolektivo aki, awor i den futuro.

Danki pa kuida otro.

Biba nos libertat, biba Kòrsou, biba nos Reino.

Ministerio konserní