Notisia

Ku plaser awe ta duna inisio na e trabounan pa konstrukshon di e parke di molina aki na Koraal Tabak;

Den hopi aspekto nos Ministerio di VVRP ta envolví den e desaroyo importante aki;

Un aspekto importante ta entrega di e pèrmitnan nesesario, tantu pa konstrukshon di e parke mes komo e ret ku ta konektá riba e parke. Di e forma aki nos ta fasilitá e invershonnan i ta pèrkurá ku esakinan ta den liña ku e vishon di Gobièrnu;

Di otro banda nos mester pèrkurá tambe pa tene kuenta ku uso efisiente di e tereno i alabes pèrkurá pa konservá nos naturalesa;

Kòrsou ta parti di mundu i meskos ku nos tambe ta sinti kambionan den mundu, nos tin e responsabilidat di kontribuí na redukshon di e kambionan klimatológiko ku ta asotá henter mundu dor di redusí nos emishon di karbon. Nos ministerio ta liderá e esfuerso aki na Kòrsou atraves di nos servisio metereológiko;

Por último ta BTP ta e entidat ku ta hasi e kálkulo di e tarifanan di koriente i awa;

Komo tal nos ministerio ta envolví den varios forma pa pèrkurá ku e invershon ta pas den e vishon di Gobièrnu pa un desaroyo sostenibel i pa un planifikashon responsabel;

E proyekto ku awe nos ta inisiá debidamente ta kumpli ku e vishon di Gobièrnu pa nos bira mas resiliente, sostenibel i ku un ekonomia mas konektá. E ta kontribuí tambe ku nos emishon di karbon ta bira ménos, kual ta nifiká mihó kalidat di nos airu. Banda di esaki e desaroyo aki ta aportá na final di kuenta en grande na mihó tarifa di koriente pa pueblo;

Mi ke felisitá Aqualectra, NuCapital i Aspiravi ku e desaroyo importante aki. Boso por sigui konta ku aporte di mi i Ministerio di VVRP pa adelanto di Kòrsou.