Publiká riba 24 Sèptèmber 2023
Presentenan tur Bon tardi,
Protokòl ya ta sirbi.
Bon biní awe na un okashon sumamente importante i speshal. Speshal pa motibu ku awe nos ta selebrá e inougurashon di un establesimentu berdaderamente úniko ku ta kombiná e mundu di arte i gastronomia.
Un restorant i Un galeria di arte kombiná, 7.1 Experience
Ta ku gran plaser i orguyo i komo Minister di Tráfiko, Transporte i Planifikashon Urbano, mi ta yama boso bonbiní na e apertura grandi aki.
Arte, den tur su forma, tin e podernan remarkabel pa krusa fronteranan, toka nos alma, i inspirá nos. E tin e habilidat di provoká pensamentu, lantá emoshon, i konektá hende di diferente orígen na un manera berdaderamente mágiko.
Di mes manera, kuminda tin e habilidat remarkabel pa trese hende huntu, krea momentunan di alegria huntu, selebrá i kompartí bida.
E kombinashon di arte i kushina den e galeria-restorant aki ta un testigu di nos kompromiso pa krea espasionan ku ta enrikesé e parti kultural di nos pais.
E ta representá e kooperashon harmonioso di kreatividat i talento, di estétika i sabor, i di inovashon i tradishon.
Awe nos ta rekonosé e trabou duru i e dedikashon di tur esnan ku a kontribuí na realisashon di e soño aki.
Sr Giovany Abath i su sra., ku ta e arkitektonan i diseñadónan ku a transformá e espasio aki den un obra maestro,
E chèfnan ku lo prepará e diferente plátonan ku lo bai komplasé nos deseonan kulinario,…
nos ta gradisí boso pa boso pashon i kompromiso.
Mi kier ekspresá mi aprésio pa e bunita proyékto aki i mi ta rekonosé e balor di un espasio manera esaki den nos komunidat.
Ta dor di boso trabounan i entusiasmo ku nos komo gobièrnu por siguí desaroyá nos País pa no solamente satisfasé nos nesesidatnan práktiko, sino tambe alimentá nos alma.
Pa finalisá, laga e galeria di arte i restorant aki sirbi komo un símbolo di kreatividat i progreso den nos País. Ku e bira un lugá kaminda kreatividat ta floresé, unda ideanan ta kambiá, unda amistatnan i memoria ta wòrdu krea.
Komo Minister di Tráfiko, Transporte i Planifikashon Urbano, mi ta orguyoso di por testiguá e inougurashon di e establesimentu impreshonante aki, i mi ta wak dilanti pa mir’é prosperá komo un parti integral di e beyésa kultural i kulinario di nos País.
Un pabien na famia Abath i na tur presente na e okashon alegre aki, i ku e galeria-restorant aki por enrikesé bida di tur esnan ku ta drenta su portanan.
Danki.
