Notisia

Bondia na tur presente.

Protokòl a wòrdu sirbí i mi ta masha gradesido na tur ku ta kompañá nos awe mainta. Komo Minister di SOAW mi ta di opinion ku ta urgente i esensial pa traha riba un kultura di pas i diálogo, mirando tur e violensia ku ta manifestando su mes rondó di nos. Pa duna algun ehèmpel:

1. Mi a bisa hopi biaha ku mester atendé ku e violensia di palabra den medionan di komunikashon. Ami mes ta unu ku ta evitá skucha radio i televishon pa motibu di e kantidat di desinformashon intenshoná i“fake news” ku ta wòrdu difundí;
2. Djasabra atardi na Lagun nos a duna sertifikado di kurso di karpinte, kaminda SOAW a duna e promé sertifikado na un“timmervrouw”, i tambe sertifikado di kurso di ‘Kuido pa Grandi’. Trahando e anochi riba diferente Sustainable Development Goals, manera number 1–kombatí pobresa, number 5–igualdat di género i number 8 trabou desente, djis algun ora despues Komunidat di Kòrsou a wòrdu sakudí dor di dos asesinato kruel na Weto.

Dia 7 di Mart 2018, Konseho di Minister a bai di akuerdo ku e ‘Plan Nashonal kontra di Violensia di Hende Muhé i Mucha’. Promé ku e logro aki i despues, Ministerio di DSLB ta invertí hopi esfuerso den lucha kontra di violensia pero tambe den prevenshon di e violensia.

E Siklo di Simia 2019 ta marka komienso di un proyekto pa atendé ku raís di e violensia riba nos Isla. Kaminda 30 di mei 1969 tabata un ekspreshon mas di e profundo frustrashonnan ku tabata afektá nos komunidat, awe, kasi 50 aña despues, ainda hóbennan ta ekspresá un sentimentu di desapunto, di rabia i di falta di perspektiva alarmante. Ku e Siklo di Simia, e partnernan den e proyekto ke apelá riba e sentimentu di responsabilidat di kada persona pa duna un kontribushon aktivo na un kultura di pas i diálogo den nos komunidat. Pa logra esei nos no por sigui artikulá nos balornan ku palabra só, pero apliká nan aktívamente den nos práktika diario, na kas i na trabou. P’esei mañan e Siklo di Simia ta ranka sali ku un kurso di dos dia pa trahadó sosial bou di e título “The personal is the professional”. Despues ta sigui den wikènt un kurso di terapia narativo pa hóbennan i profeshonalnan dediká na arte dramátiko. Pasobra huntu nos tin ku kambia e diskursonan dominante ku ta fomentá violensia den nos komunidat. Finalmente nos tin kuater dia di kurso intensivo pa personal na prizòn ku no solamente tin ku atendé ku esnan violento, pero tambe kontribuí na resosialisashon di e kliente den detenshon. Personal de prizòn tambe meresé, den e sentido aki, tur nos apoyo.

Den e kolekshon di NAAM, tin un kolekshon di Simia ku nos baluarte Ellis
Juliana a kolekshoná den añanan sesenta, pa pueblo di Kòrsou. Awe un generashon nobo ta kontribuí na sembra pas.
Mirando tur esaki, mi ta gradisí di kurason, tur partner den e proyekto aki:

• Sr. Dimitri Cloose, direktor di NAAM
• Sr. Richenel Ansano, Kurator di e Eksposishon di 30 di Mei 1969
• Sra. Meyrtha Leetz–Cijntje, Presidente di Fundashon Sentro di Dama
• Sra. Malvina Cecilia, Unithoofd Correctie na SDKK
• Sr. Urny Floran, Director di SDKK
• Sra. Desiree Lai–Promes, Secretaris Generaal Ministerio di Hustisia
• Mi kolega minister Sr. Quincy Girigorie, Minister di Hustisia
• Koleganan di SOAW

Ban pa huntu nos logra un eksitoso Siklo di Simia 2019 !

Danki.

MAS NOTISIA

Ministerio konserní: Desaroyo Sosial, Labor i Bienestar