Publiká riba 20 Sèptèmber 2018
Willemstad – Servisio pa Planifikashon Urbano (ROP) ta anunsiá ku e servisio ta sera riba djaluna 24 di sèptèmber entre 8or di mainta pa 12or di mèrdia. Esaki ta relashoná ku un trayekto interno pa personal di ROP pa huntu optimalisá e servisio.ROP ta habri bek for di 2or di atardi pa públiko.
ROP ta e instansia di Gobièrnu ku ta entre otro responsabel pa otorgá pèrmit di konstrukshon, duna konseho pa proyektonan ekonómiko pa loke ta planifikashon urbano, duna konseho pa tur trabou di konstrukshon, duna number di kas ofisial, ets. Pa e organisashon por duna komunidat mas mihó servisio, ta importante pa e personal ta bon ekipá i ta funshoná komo un ekipo. Minister Jesus-Leito huntu ku maneho di ROP a inisiá un trayekto di diferente seshon pa forma un ekipo sólido ku ta traha na benefisio di nos komunidat.
Lo tin 1 seshon mas dia 1 di oktober durante kual tambe e servisio lo ta sera parti mainta.
ROP ta pidi komprenshon pa e momentu ku ta sera i alabes su diskulpa pa kualke inkumbinensia ku esaki por kousa. Durante di e orarionan ku ROP ta sera, por manda e-mail na ROP via di info.rop@gobiernu.cw.
