Publiká riba 06 Febrüari 2020
Willemstad – Djasabra awor, dia 8 di febrüari na ICUC di 9’or di mainta pa 2’or tra’i mèrdia e ministerionan di SOAW i MEO ta organisá un enkuentro pa tur persona ku a registrá komo desempleado serka ministerio di SOAW.
E meta di e enkuentro aki ta pa hasi un ‘pre-screening’ di e kandidatonan ku tin interes i potensial pa traha den e sektor di Hospitalidat. E kandidatonan ku pasa e ‘pre-screening ‘ lo wòrdu someté na un entrevista mas profundo pa saka e kandidatonan ku lo bai tene un entrevista ku e diferente kompanianan den e sektor di Hospitalidat.
E realidat ta ku e sektor di turismo tin mester di mas hende pa traha den turismo i ainda ta buska personanan motivá pa traha den e sektor aki. Tur hende ku a registrá pa e sektor di HORECA ku ta buskando trabou i tambe esnan ku no a registrá pero ku ta buskando trabou, ta bon biní.
Spesífikamente ta buskando hende pa prepará nan pa e 4 disiplinanan den e sektor di Hospitalidat: Asistente di servisio (Bediening assistent), Asistente di kushina (Keuken assistent), Asistente di Seguridat (Security) i Trabou doméstiko (Housekeeping).
Ku bo ta un kliente ku a yega di registrá i ainda no a kai den selekshon, akudí na e re-enkuentro organisá pa e ministerionan di SOAW i MEO na ICUC na Otrabanda.
