Publiká riba 21 Ougùstùs 2024
Willemstad – Despues ku siman pasá a logra yega na un akuerdo ku nan agensia na Trinidad, gerensia di Don Andres den persona di Evi de Jongh i Elouise de Jongh a bin informá Minister di Desaroyo Ekonómiko di e bon notisia ku entrante 20 di sèptèmber Don Andres ta inisiá transporte di karga entre Kòrsou i Trinidad. “Mi ta hopi kontentu ku e logro aki i e ta yena mi ku orguyo pa mira kon boso a perseverá pa logra boso meta” Minister Cijntje a bisa e empresarionan. E ruta entre Kòrsou i Trinidad ta habri kaminda pa mas komersio ku Trinidad, i ta duna oportunidat na empresarionan di Kòrsou, Aruba i Boneiru eksplorá e merkado aki. Tambe nos por wak posibilidat pa trese produktonan for di nos mes región, kual por resultá mas benefisioso. Na 2019 Don Andres a start e ruta entre Kòrsou i Republika Dominikana kual a krese komersio entre Kòrsou, Aruba, Boneiru i Republika Dominikana. Awor ku ta agregá Trinidad, nos a krea un hub den sur di Karibe ku ta stimulá mas komersio i prosperidat den nos region. Ku e ruta pa Trinidad aki nos ta duna kontenido na e MOU ku Minister di Desaroyo Ekonómiko di Kòrsou Ruisandro Cijntje a firma ku Minister di Komersio i Industria di Trinidad & Tobago Paula Gopee-Scoon na 2022. Nos ta negoshando tambe un akuerdo komersial di alkanse parsial ku Trinidad & Tobago i nos tin konekshon aereo pa stimla turismo i biahenan di negoshi. Trinidad tin hopi pa ofresé Kòrsou i Kòrsou tin hopi pa ofresé Trinidad. Konektividat ta esensial pa logra mihó interkambio komersial. Minister Cijntje ta felisitá famia De Jongh di Don Andres ku e logro importante aki i ta stimulá tur empresario pa sigui perseverá i logra boso metanan. Meo huntu ku su organisashonan tei pa stimulá i respaldá nos empresanan pa nan hasi negoshi, eksportá mas pa medio di programanan di sosten, kapasitashon, akuerdo komersial pa garantisá akseso preferensial na merkado i un ambiente favorabel pa hasi negoshi. Nos ta sigui traha pa progreso di Kòrsou. Don Andres ta yega for di Trinidad dia 22 di sèptèmber 2024.
