Publiká riba 03 Yanüari 2023
WILLEMSTAD – Resientemente Sentro di Detenshon i Korekshon Kòrsou (SDKK) a risibí un bunita donashon serka dos organisashon, esta Stichting Miss IQ i AFAS Foundation.
Stichting Miss IQ i AFAS Foundation ta dos organisashon ku ta buska materialnan di bon uso for di Hulanda i duna esaki komo donashon na skolnan i otro instituto. Den kuadro di esaki SDKK a risibí for di Hulanda 2 kontainer kargá ku material i instrumènt spesial pa su klientenan. Loke tabata remarkabel ta e piano blanku ku a keda risibí entre e materialnan, di kual nos direktor suplente señor Ricardo tabatin e honor pa por a toka i siguramente lo bai haña un lugá spesial den prizòn.
Na okashon di entrega di e dos kontainernan na SDKK, tabata tei presente señora Ruth Groenewoud di Stichting Miss IQ, representantenan di AFAS Foundation, personal i gerensia di SDKK, tambe señor Benita ku ta hefe di departamentu di korekshon i direktor suplente señor Ricardo ku na nòmber di gerensia di prizòn i tambe e klientenan a gradisí pa e bunita gesto ku a wòrdu duná na e instituto.
Finalmente gerensia di prizòn kier a gradisí un biaha mas Stichting Miss IQ, AFAS Foundation i Minister Sithree van Heydoorn pa nan koperashon pa ku e dos kontainer di material ku a bini pa SDKK, i alabes kier deseá komunidat un felis aña 2023 yená ku dicha i prosperidat.
