Notisia

Skolnan di Fundeshi Kolegio San Dominico i Emmy Berthold trahando riba un futuro briyante, a bira miembro di UNESCO su Ret di Skolnan Asosiá (Skol di UNESCO- ASPnet)

Willemstad. Kolegio San Dominico i Skol Emmy Bertholda a haña aprobashon di UNESCO pa forma parti di e ret internashonal di UNESCO-ASPnet. E dos skolnan aki ta pertenesé awor na un komunidat global di skol ku for di 1953 ta stimulá i krea mas oportunidat. Nan ta haña oportunidat:

• pa partisipá na interkambio i konsientisashon di balor den edukashon pa komprenshon internashonal i den inovashon

• pa partisipá den kampañanan global, selebrashon i kompetensianan konforme prioridatnan di UNESCO.

• pa konektá, kolaborá òf fraternisá ku skolnan partner den mas ku 180 pais rònt mundu.

UNESCO Associated Schools Network (ASPnet) a originá na 1953, momentu ku UNESCO a lansa un proyekto ku yama ‘Plan Koordiná pa Aktividatnan Eksperimental den Edukashon pa Biba den un Komunidat Mundial’. Awendia, ASPnet ta representá un ret global di 11,700 instituto edukashonal den 182 pais ku ta ofresé edukashon pre-básiko, básiko, sekundario, tékniko i vokashonal òf entrenamentu pa bira maestro. Miembresia di ASPnet ta pòrnada pa tur miembro. No mester paga pa aplikashon, atmishon, sertifikashon òf renobashon di miembresia.

E dos skolnan a apliká na UNESCO i nan a haña aprobashon basá riba e aktividatnan ku nan ta desplegá. Ku afiliashon di Kolegio San Dominico i Emmy Bertholdschool, Kòrsou por ta orguyoso di tin awor kuater skol ku por yama nan mes Skol di UNESCO. E promé ta Skol di Fundeshi Kolegio Don Sarto/Soto na 2009 i e di dos na 2018 ku ta Skol di Fundeshi J.W.Th. Schotborgh. Otro luna riba dia internashonal di Toleransia e skolnan ta risibí nan sertifikado, durante un aktividat atardi riba Wilhelminaplein den kuadro di e dia akí. Un pabien na e skolnan di Fundeshi Kolegio San Dominico i Emmy Berthold.

Edukashon ta UNESCO su prioridat kardinal, pasó e ta un derechi humano básiko i e fundeshi kaminda ta konstruí pas i stimulá desaroyo duradero. Skolnan interesá pa apliká por tuma kontakto ku UNESCO Curaçao via di email info@natcomcuracao.org

MAS NOTISIA

Ministerio konserní: Enseñansa, Siensia, Kultura & Deporte