E 7 monumentonan di e Kaminda di Resistensia: The Black Revolt!
Publiká riba 19 Ougùstùs 2019
Djasabra 17 di ougùstùs 2019, ta eksaktamente 224 aña pasá ku e rebelion di katibu na Kòrsou a inisiá bou di liderazgo di e gran lider i nos heroe Tula (Toulah), un katibu lokal na Plantashi Kenepa. Bandabou tabatin alrededor di 4.000 pa 5.000 habitante den 1795 i mayoria tabata esklavisá.
Tula a bin ta prepará e rebelion pa un par di siman i riba 17 di ougùstùs 1795 na Plantashi Kenepa a aserká doño di Plantashi Caspar Lodewijk van Uytrecht huntu ku alrededor di 50 katibu, kaminda Tula a informá van Uytrecht, ku nan no ke ta su katibunan mas. Van Uytrecht a referí nan na e Gobernador na Fort Amsterdam pa entregá nan kehonan. Tula huntu ku e otro katibunan i otro lidernan a kuminsá kana e Kaminda di Resistensia i a sigui pa Lagun i otro sitionan liberando diferente katibu den nan lucha kontra sklabitut.
E rebelion aki a dura mas ku un luna largu di konflikto entre e esklavonan i e Gobièrnu di e tempu ei. Riba 19 di sèptèmber 1795 Tula i Karpata a keda traishoná dor di un otro katibu. Nan a keda detené i e rebelion a terminá. Riba 3 di òktober 1795, kasi 7 siman despues Tula i otro lidernan Karpata, Louis Mercier i Pedro Wacao i mas katibu a keda torturá i likidá.
Despues di e rebelion e gobernashon hulandes a bini ku areglonan nobo pa duna katibunan algun derechi. Komo rekuerdo, na Kòrsou na diferente parti den e area di Bandabou i tambe na Rif, nos ta enkontrá shete (7) monumento blanku ku un man i un pida kadena na e man ku ta indiká e kaminda di resistensia (The trail of resistance).
Momumento di Man na RIF: Título: “Liber al Fin”.
