Publiká riba 10 Febrüari 2020
E BARKU KRUSERO AIDAPERLA KONFORME SU SKEMA A YEGA KÒRSOU DJADUMINGU 9 DI FEBRÜARI 2019 PA 6’OR DI MAINTA I TA MARA NA MEGA PIR 2 (TULA).
Willemstad, 9 di febrüari 2020 – Ministerio di Salú, Medio Ambiente i Naturalesa (GMN) ta informá ku den kuadro di su trabounan di monitoreo i akshon pa evitá ku e vírus kontagioso 2019-N Coronavirus ta drenta Kòrsou, ta sigui informá.
E barku AIDAperla (2017) di AIDA Cruises ku tin un kapasidat di 4.350 pasahero tabata hopi den notisia últimamente. Esaki pa e echo ku algun Isla den Karibe, den e kaso aki Sint Lucia i Dominica, a ninga Aidaperla ku 3.286 pasahero i ± 900 personal ku a sali dia 30 di yanüari 2020 for di Bridgestown na Barbados drenta nan puerto. Esaki debí ku algun di e pasaheronan tabatin síntomanan di infekshon respiratorio. Ora e dos Islanan akiriba menshoná a ninga AIDAperla di drenta nan haf nan a sigui nabegá bai e isla di Sint Maarten, ku no tabata riba interenario, i nan por a drenta haf di Sint Maarten sin ningun problema. Esaki meskos ku e otro puerto ku nan a bai despues.
E krusero AIDAperla a drenta Kòrsou djadumingu di 9 di febrüari 2020 pa 6’or di mainta.
Ta bon pa informá i enfatisá ku te ku aworakí no tin ningun kaso registrá i konfirmá di Coronavirus den e region di Karibe kaminda e barku krusero AIDAperla ta nabegá konforme su interenario. No tin ningun indikashon tampoko ku e turistanan krusero riba e barku aki ta bin for di e área di riesgo kaminda e vírùs 2019-N Corona a originá, esta na Wuhan, provinsia di Hubei na China.
Kon Kòrsou ta atendé ku preparashon di e menasa di e Coronavirus?
E departamento di Epidemiologia di e Ministerio di Salú, Medio Ambiente i Naturalesa (GMN) su trabou rutinario, ora un barku krusero tin ku drenta nos puerto, ta haña promé un formulario titulá “Maritime Declaration of Health (MDH)” via e agentenan di e linianan krusero. Esaki ta un formulario ku ta indiká ku detaye kon e estado di salú ta di e pasaheronan ku ta malu na bordo di un barku. Aparte di e formulario (MDH) aki e funshonarionan di e departamento di Epidemiologia ta hasi preguntanan adishonal ku por redundá den un bishita di inspekshon dor di e funshonarionan riba e barku pa determiná ku e barku por drenta nos puerto si òf no.
Den kaso ku e barkunan ta kumpli ku e protokòl pa drenta nos puerto, pero si tin algu persona ku ta malu riba e barku no ta pèrmití e pasaheronan aki baha for di barku. E situashon di AIDAperla no ta otro for di e otro barkunan ke ta drenta nos haf semanalmente. Basá riba e kontrol aki i basá riba e echo ku no tin e Coronavirus den e region di Karibe no tin ningun motibu epidemiológiko konforme protokòl pa a ninga e barku AIDAperla drenta nos puerto di Kòrsou djadumingu 9 di febrüari 2020 pa 06.00 mainta i mara na Mega pir Tula. AIDAperla lo sali bek pa 22.00 for di Kòrsou.
Promé ku e AIDAperla a drenta nos haf funshonarionan di e departamento di Epidemiologia a subi e barku i no a haña nada partikular. Meskos ku a hasi ku e otro dos (2) barkunan ku tambe a drenta haf di Kòrsou djadumingu dia 9 di febrüari ku ta Eurodam ku 2.014 pasahero i Norwegian Gem ku 3.130 pasahero a bordo. No tabatin ningun partikularidat serka nan tampoko.
Pa mas informashon tuma kontakto ku Ministerio di Salú, Medio Ambiente i Naturalesa riba e siguiente numbernan di informashon: 432-2850, 432-2851, 4322855, 0800-0888.
