E fecha históriko 30 di mei 1969 a keda konmemorá - Informashon tokante Gobièrnu di Kòrsou Bo opinion

Notisia

E fecha históriko 30 di mei 1969 a keda konmemorá

Geplaatst op 31 May 2021 dor di Ministerio Enseñansa, Siensia, Kultura & Deporte

WILLEMSTAD – Gobièrnu a konmemorá e di 52 aña ‘30 di mei 1969’ ku vários aktividat durante di e dia. Parti mainta tabata tin e seremonia ofishal riba Plaza Wilson (Papa) Godett ku presensia di Gobernador sra.Lucille George-Wout, Minister sr. Quincy Girigorie, Minister sra.Zita Jesus-Leito i Minister sr. Hensley Koeiman, Parlamentarionan i representantenan di famia Godett, Nita, Gutiérez i Gerardina. Tambe a pone krans pa e monumento na Berg Altena i na e grafnan na Santa Maria di e defuntunan Nita/Gerardina i na graf di e defuntu di famia Gutiérrez na santana na Kwartier. Atardi a tene un debate públiko ku a keda transmití via plantanan ofisial lokal i plataformanan sosial di Gobièrnu ku partisipashon di parlamentario, analista polítiko, sindikalista, edukashon i mas.

E konmemorashon parti mainta a keda transmití ‘live’ di 08:00 pa 09:30 i e programa a konta ku partisipashon di e lidernan spiritual di e komunidat Hindú, Hudiu, Mòslem i Katóliko. Jurgen La Cruz & Friends a deleitá na e aktividat ku nan presentashon i e hóben Ralph Winedt a presentá un poema. Ministernan ku ta hiba palabra ta Minister demishonario sra. Zita Jesus-Leito ku a representá e Minister enkargá ku kultura i Minister sr. Quincy Girigorie ku a representá Promé Minister. Minister Quincy Girigorie huntu ku representante di famia Godett a pone krans na e busto di sr. Wilson ‘Papa’ Godett (Q.e.p.d.) i sr. Anthony Godett, representante di famia Godett, a hiba palabra.

Despues di e parti ofisial a sali 3 karavana simultáneamente ku a bai Berg Altena (Kaya Gerardina- Gutiérrez), Santana Santa Maria i tambe Santana Groot Kwartier. Na Berg Altena na e obra “50 aña 30 di mei” trahá pa sr. Yubi Kirindongo representashon di Parlamento den persona di parlamentario sra. Ruthmilda Larmonie-Cicilia den kompania di Direktor di Kultura i Deporte sra.Lizette Sambo-Velder i Pastor Curtis Meris a hiba palabra i pone un krans na honor di e defuntunan Gerardina – Gutiérrez. Na Santanan Santa Maria i Santana Groot Kwartier parlamentarionan sr. Wendel Mercelina i sr.nSheldrey Osepa a bishitá e grafnan di sr. Nita i sr. Gerardina (Santana Santa Maria) i e graf di sr. Gutiérrez (Santana Groot Kwartier) den kompania di e respektivo famianan pa pone krans.

E debate públiko a keda transmití via di e páginanan ofisial di Gobièrnu di Kòrsou i tambe via di e kanalnan di televishon lokal di 17:00 pa 19:00. E debate públiko a trata e tema “Resiliensia di komunidat di Kòrsou;1969 kompará ku 2021. Similaridat i siñansanan pa surpasá krísis sosio- ekonómiko”. Kordinashon di e debate tabata na enkargo di organisashon Debat.Ed (Debate Education Foundation). Sra. Nathania Engelhardt tabata e moderador i e debate a konta ku partisipashon ku representashon di sindikalista Alcides Cova, analista-polítiko Sidney (Bicho) Justiana, parlamentario Gwendell Mercelina Jr., dosente Nicole Henrietta i antropólogo Aisha Leer.

pa un relato fotográfiko por bishitá facebooek di Ministerio di ESKD: Komemorashon 30 mei 2021

Ministerio konserní