Bo opinion

Notisia

E PROMÉ 3 KUARTALNAN DI AÑA 2018 A TRANSKURÍ POSITIVO PA SEKTOR TURÍSTIKO

Geplaatst op 30 October 2018 dor di Ministerio Desaroyo Ekonómiko

WILLEMSTAD- E promé 9 lunanan di aña 2018 a marka un inisio sumamente positivo pa nos sektor turístiko. Esaki minister di Desaroyo Ekonómiko, Sr. Steven Martina a duna di konosé den un konferensia di prensa huntu ku Ministerio di Desaroyo Ekonomiko(MEO) i partnernan Curaçao Tourist Board (CTB), Curaçao Hospitality & Tourism Assosiation (CHATA) i Curaçao Ports Authority (CPA).


Periódikamente MEO, CTB, CHATA i CPA a bin ta tene konferensia nan di prensa den kual kada organisashon ta duna informashon balioso na pueblo pa loke ta trata desaroyonan turístiko pa e periodo tras di lomba.
Ta un echo ku e sektor turístiko ta un pilar fuerte pa ku e kresementu ekonómiko di nos pais. Turismo ta un sektor ku ta keda trese invershonnan balioso pa Kòrsou, generá kuponan di trabou i alabes e sektor  tin un impakto signifikante riba otro sektornan dor di turistanan ku ta hasi uso di diferente servisionan durante di nan estadia riba nos pais.

 Pa loke ta trata e periodo di yanüari pa sèptèmber 2018 e sektor di turismo a floresé di tur banda.

Curacao Tourist Board (CTB) a reportáku un total di 309.732 turista di estadia a keda risibí durante e promé 9 lunanan di 2018. Aña pasá a registrá 293.160 turista di estadia durante e mesun periodo, esaki ta un subida di 6%. Pa aña 2018, CTB a pone komo meta pa alkansá un total di 420.200 turista di estadia. Por bisa ku e kantidat realisá na final di sèptèmber ta representá 74% di meta ku ofisina di turismo a stipulá pa  2018. E kantidat total di anochi a konosé un subida di 4% den e promé 9 lunanan di aña 2018. Total turistanan a keda 2.743.144 anochi na Kòrsou.

Pa loke ta trata kantidat di stul di e diferente aerolíneanan ku ta bula pa Kòrsou esaki ta mustra positivo. Pa e próksimo 6 lunanan ku ta e temporada di wenter, Kòrsou lo tin un total di 531 mil stul kual ta un oumentu di 13% kompará ku e mesun periodo na aña pasá.

Na fin di sèptèmber, CTB a lansa su kampaña nobo di branding internashonal ku e slogan, ‘Sintié pa Bo Mes.’ E kampaña ta hala atenshon na nos isla su historia riku, su outentisidat i e variedat úniko di sitio i aktividat ku ta duna kada bishitante e libertat pa eksplorá Kòrsou manera e ta deseá. E avisonan nobo ta sumamente yamativo, inspirá pa Kòrsou su estétika vibrante. Kaminda ta suprayá ku Kòrsou no ta manera e otro islanan den region, i asina hala atenshon riba Kòrsou.

Durante di e konferensia di prensa, CTB huntu ku CHATA a lansa tambe un seri di dokumentario titulá ‘Turismo pa nos TUR’. E dokumentario lo konsistí di diferente video kòrtiku di 1 minüt kaminda ta ilustrá e benefishinan di sektor di turismo. Den e promé video sr. Charles Merencia, Bellboy na Avila Beach Hotel ta splika kiko ta loke mas e gusta di su trabou i tambe dikon ta importante pa trata e turista bon. Por medio di e seri di dokumentario aki CTB i CHATA kier inspirá i motivá tur ku ta benefisiá sea direktamente o indirektamente di sektor di turismo. Turismo tei pa nos tur; ban huntu duna nos aporte pa logra mas kresementu pa nos pais.

Curaçao Hospitality & Tourism Assosiation (CHATA) tambe na su turno ta reportá kresementu den prestashon hotelero den e lunanan tras di lomba. En komparashon ku mesun temporada aki na aña 2017, e okupashon di kambernan na Kòrsou a kresementu di 77,9 % pa 81.5% . Mas aleu, e tarifa promedio diario (ADR) i tambe e entrada pa kamber disponibel (RevPAR) tambe a subi. Kompará ku e promé 9 lunanan di 2017 e tarifa promedio a subi di $ 139.84 pa $ 161.65 miéntras e entrada pa kamber disponibel a alkansá un subida di $104.74 pa $126.37.

 Di akuerdo ku CPA,turismo krusero tambe a konosé un kresementu durante e promé 9 lunanan di aña 2018. De echo, Kòrsou a risibí un total di 13% mas tantu barku krusero den e periodo di yanüari pa sèptèmber 2018 kompará ku e mesun periodo aki den 2017. Na aña 2017 esaki tabata un total di 176 barku krusero entre yanüari i sèptèmber miéntras pa 2018 Kòrsou a risibí un total di 199 barku den e mesun temporada aki. E oumento den kantidat di barku krusero ku a mara na un di nos puertonan a nifiká alabes un oumento di 28% den e kantidat di turista krusero ku a bishita nos pais den e temporada tras di lomba. Te ku sèptèmber 2018 Kòrsou a risibí un total di 525,258 turista krusero.

Durante e konferensia di prensa aki MEO tambe a splika ku e kresementu turístiko ku por a nota den e promé 9 lunanan di 2018 tabata tin un impakto positivo pa Kòrsou. Ta proyektá ku den e promé 9 lunanan di aña 2018 e sektor di turismo a generá un total di 1.445 mion florin pa nos ekonomia lokal. Esaki ta representá un subida di 5.6% kompará ku e mesun periodo na aña 2017. Riba página di Facebook di Ministerio di Desaroyo Ekonómiko e presentashon di e diferente stakeholdernan huntu ku detayenan di tur e sifranan ariba menshoná lo ta disponibel.

Ministerio konserní