Publiká riba 06 Òktober 2026
Willemstad, 6 di òktober 2026 – Durante Human Rights Conference Curaçao 2026 awe a presentá ofisialmente e vershon na Papiamentu di Konvenio Oropeo pa Derechonan Humano (EVRM). E konvenio a wòrdu entregá na Gobernador interino di Kòrsou i na Minister di Hustisia, Shalten Hato.
Pa Minister Hato, e entrega tabatin un nifikashon spesial, ya ku el a risibí e konvenio na Papiamentu for di man di Darren Hernandez, funshonario di Binnenlandse Zaken. E tradukshon ta un paso importante pa hasi derechonan humano mas aksesibel i komprendibel pa komunidat di Kòrsou. Minister Hato a fungi komo keynote speaker durante e konferensia, dilanti di un sala yená ku, entre otro, representantenan di Konseho di Oropa, profeshonalnan den ramo hurídiko, representantenan di gobièrnu i organisashonnan sosial, akadémikonan, studiante i young professionals.
Den su diskurso prinsipal, Hato a enfatisá ku derechonan humano no mester eksistí solamente riba papel, sino mester por sinti nan efekto den bida diario. Derechonan humano ta hunga un papel ora un siudadano ta haña su mes dilanti di gobièrnu, ora un mucha tin mester di protekshon, ora un persona ta wòrdu detené òf ora un persona ta wòrdu privá di su libertat. Durante e konferensia a para ketu tambe na posishon di Kòrsou denter di e sistema internashonal di derechonan humano. EVRM ta aplikabel na Kòrsou pa vários dékada kaba. Segun Hato, ta di gran importansia pa abitantenan konosé nan derechonan i komprondé ki protekshon e derechonan aki ta brinda nan.
Durante e konferensia diferente tema a wòrdu atendé, entre otro derechonan humano fundamental, derechonan di mucha i minorianan, detenshon, rehabilitashon i e fortifikashon interior di derechonan humano den práktika. Bou di guia di moderadó Jo-Anne Bakhuis-Da Costa Gomez, tabatin espasio tambe pa pregunta, sugerensia i diálogo ku e presentenan. E koperashon ulterior entre Kòrsou i Konseho di Oropa tambe tabata sentral. Minister Hato a enfatisá importansia di koperashon práktiko, entre otro riba tereno di reforma di sistema di detenshon, kuido forénsiko, rehabilitashon i desaroyo ulterior di profeshonalnan i institutonan.
Entrega di e tradukshon di EVRM na Papiamentu a forma un momento importante i simbóliko den e kuadro aki. “Si derechonan humano ta di tur hende, hende mester por lesa, papia i komprondé nan den nan propio idioma. Derechonan humano no ta pertenesé solamente na huristanan. Nan ta pertenesé na nos tur,” segun Minister Hato. Ku Human Rights Conference Curaçao 2026, ta sigui invertí den mas konsientisashon, konosementu i koperashon pa sigui fortifiká protekshon di derechonan humano na Kòrsou.
[Fin di komunikado]
