Notisia

Willemstad- Den e mishon ku Gobièrnu di Kòrsou tabatin na la Guajira-Colombia, Minister di Enseñansa, Siensia, Kultura i Deporte sra. Marilyn Alcalá-Wallé a asisti huntu ku Direktor di Sektor di Kultura i Deporte sra. Lizette Sambo-Velder MBA na un konferensia spesífiko riba ekonomia oraño (economia naranja). E koló oraño ta para pa kultura, kreatividat i identidat. Ekonomia oraño ta e ekonomia ku ta konsentrá riba e potensial di e desaroyo di e industria kreativo atraves di e herensia kultural di e nashon i e kreatividat di e ser humano ku ta keda ekspresá den entre otro arte visual, músika, sinematrografia, artesania, diseño di moda, diseño gráfiko i diferente otro tipo di arte kontribuyendo asina na un identidat di e pueblo. 

Por ehèmpel na la Guajira e departamento spesial turístiko i di kultura, ta promové entre otro e kultura i artesania Wayu bastante ku ta e kultura i artesania di e indígenonan ku ta biba den e área akí di Colombia. Ya pa basta tempu tin e ekonomia oraño aki pero esaki no ta bon strukturá i no tin un maneho definí ahinda riba e área akí.  Esaki ta nifiká ku mester krea un struktura i e infrastruktura pa e hendenan ku ta operá den e sektor akí por haña un mihó sosten i un plataforma pa nan por bende nan produktonan. No solamente lokal pero tambe internashonalmente. Nos a kuminsá ku la Guajira, Riohacha pa motibu ku aki tin un interes sumamente grandi pa yega na un “win-win” riba e parti akí pa kada pais.

Durante e enkuentro akí diferente orador a amplia riba e diferente strategianan kon pa por intensivá e formanan di koperashon, pa mira kon por bini ku strategianan pa por merkadiá e produkto i tambe strategianan pa internashonalisá e produktonan. Tambe kua ta e diferente produkto i servisionan ku por keda kalifiká pa ekonomia oraño. Hustamente den e lus akí nos artistanan di Kòrsou a haña un plataforma pa demostrá nan potensial durante di enkuentronan i tayernan pa ekspresá nan mes den artesania , baile i músika. Kòrsou a probechá di e invitashon akí pa ekspresá tambe e potesial di su artistanan pa medio di e areanan akí i tambe a duna tayer i hasi un presentashon di nos rítmonan musikal riba un tarima sumamente grandi i bon bishitá durante e festival di Francisco el Hombre i pasa tambe video i potrètnan di paisahe di Kòrsou pa laga e pueblo di la Guajira i tur su bishitantenan purba un tiki di kiko Kòrsou tin di ofresé i hasi un interkambio. Esaki ta muestra di e motibu pakiko nos tin ku sigui duna importansia, sigui duna sosten i traha riba strategianan pa sigui krea plataformanan pa nos personanan ku ta traha den e area di ekonomia oraño pa nan tambe por gana nan pan di kada dia.

*****************************************

MAS NOTISIA

Ministerio konserní: Enseñansa, Siensia, Kultura & Deporte