Publiká riba 03 Ougùstùs 2023
Willemstad – Servisio pa Planifikashon Urbano (ROP) ta informá ku e edifisio ubiká na skina di Keukenstraat i Sommeldijkstraat 8 den área di Punda ta forma un peliger pa habitantenan di e kaya, i tur ku ta move den su besindario.
E edifisio aki ta un propiedat priva i e doñonan a risibí karta di VVRP pa tuma medida adekuá. Sinembargo, e doñonan no a hasi kaso na e instrukshon di Gobiernu i pa e motibu ei, e edifisio su estado a sigi deteriorá.
Ekspertonan di ROP a hasi un investigashon profundo di e estado di e edifisio aki, i a konstatá ku esaki no por keda restourá mas. Konsekuensha di esaki ta ku mester basha esaki abou pa por garantisá seguridat di tur persona den e área.
Ta bon pa enfatisá ku e edifisio aki no ta un monumento protehá. ROP lo duna enkargo na un kontratista pa desmantelá esaki na un manera responsabel. Lo sera e kayanan konserní riba e dia ku e trabounan di desmantelashon ta bai tuma lugá. E fecha lo wòrdu determina huntu ku polis di tráfiko i lo wòrdu anunsiá na tempu.
Tantu habitantenan i organisashon di bario a mèldu na gobièrnu tokante estado di e edifisio aki. Gobièrnu, komo esun finalmente responsabel pa seguridat di su suidadanonan, ta aktuá awor responsabelmente denter di kuadro di su tareanan legal, i lo kobra e doñonan di e edifisio aki debidamente pa e trabounan di desmantelashon. A hasi diferente apelashon na nan pa hasi esaki, pero esaki no a resultá éksitoso.
ROP ta bolbe hasi un apelashon na tur doño di edifisio den nos sentro di suidat pa sòru di mantené nan edifisio den un bon estado pa asina evitá desgrasia i molester pa hende por kana i/of auto por kore.
Pa mas informashon por tuma kontakto ku ROP via info.rop@gobiernu.cw.
