Notisia

Willemstad – E di shete edishon di e boletin Innercity Willemstad a keda publiká. Den e edishon aki, ta wak bèk riba e gran éksito di Blue Wave Innercity Festival, ku durante tres dia a atraé míles di bishitante na nos sentro históriko di Willemstad, i a transform’é den e kurason briante di Kòrsou. E evento tabata un símbolo di union, kultura, talento i orguyo nashonal, ku enfoke riba e distriktonan di Punda, Otrobanda, Pietermaai i Scharloo.

Ademas, e boletin ta duna un bista riba e desaroyo kontinuo den sentro di siudat. Ministerio di Desaroyo Ekonómiko (MEO) i Ministerio di Tráfiko, Transporte i Planifikashon Urbano (VVRP) ta trahando aktualmente riba un ‘roadmap’ pa implementashon di e Vishon di Sentro di Siudat 2026-2035. Puntonan importante den e proseso ta inkluí entre otro:

– fortalesé identidat di Willemstad,

– ⁠hasi Willemstad mas bèrdè,

– ⁠krea un mihó orientashon den siudat,

– ⁠establesementu di un ‘City Management’, i

– ⁠un kolaborashon estrecho entre sektor públiko i privá.

Ku e boletin mensual aki, Innercity Willemstad ta sigui informá habitante, empresario, bishitante, i otro interesado tokante proyekto, inisiativa, i desaroyo, ku ta kontribuí na un sentro di siudat mas atraktivo, bibu i prepará pa futuro.