EFO ta tuma lugá na luna di mei 2021 - Informashon tokante Gobièrnu di Kòrsou Bo opinion

Notisia

EFO ta tuma lugá na luna di mei 2021

Geplaatst op 27 January 2021 dor di Ministerio Enseñansa, Siensia, Kultura & Deporte

WILLEMSTAD – Gobièrnu di Kòrsou den deliberashon ku tur ‘stakeholder’ di enseñansa a yega na palabrashon konkreto pa ku Prueba Sentral pa Enseñansa di Fundeshi (Eindtoets Funderend Onderwijs -EFO). Durante di vários reunion interno ku Sindikato, Direktivanan di skol, Inspekshon di Enseñansa i Sentro di Ekspertisia pa Prueba & Èksamen (ETE), a yega na akuerdo pa sigui ku EFO pa e aña eskolar 2020/2021.

Esaki ta nifiká ku tur alumno ku aktualmente ta den grupo 8 mester partisipá na e èksamen akí. Resultado di e EFO huntu ku e alumno su rapòrt edukashonal (onderwijskundig rapport) ta konta komo resultado final pa e alumno por sigui pa enseñansa sekundario/avansá.

E skema pa e periodo di Prueba Sentral (EFO) ta:

Fecha
Materia
5 mei Papiamentu 1
6 mei Papiamentu 2
7 mei Hulandes 1 i Matemátika 1 (R&W1)
11 mei Hulandes 2 i Matemátika 2 (R&W1)
12 mei Hulandes 3 i Matemátika 3 (R&W1)
17 mei te ku 21 mei Siman di repaso (Inhaalweek)
 

Organisashon di EFO ta keda hasí pa Ministerio di Enseñansa, Siensia, Kultura i Deporte huntu ku direktivanan di skol/skolnan di fundeshi. ETE huntu ku sektor di Enseñansa i Siensia ta fungi komo punto sentral pa e organisashon na nòmber di Gobièrnu. Tur alumno ta haña informashon di e proseso via di e direktiva di skol/skol di fundeshi di e alumno. Pa mas informashon por tuma kontakto ku e  komishon di EFO na efocom.curacao@gmail.com i/òf info@ete.cw.

Ministerio konserní