Èksamen di reibeweis pa studiantenan - Informashon tokante Gobièrnu di Kòrsou Bo opinion

Notisia

Èksamen di reibeweis pa studiantenan

Geplaatst op 14 March 2021 dor di Ministerio Maneho di Gobernashon, Planifikashon i Servisio Públiko

WILLEMSTAD – Departamento di Reibeweis (Sta. Rosaweg) di ministerio di Maneho di Gobernashon, Planifikashon i Servisio Públiko ta informá ku e aña akí tambe lo tin pa hóbennan ku lo bai studia den eksterior, algún lugá reservá pa pasa èksamen den e periodo 14 yüni t/k 13 ougùstùs 2021. Esaki ta konta pa tantu esnan ku ta bai studia via Stichting Studiefinanciering Curaçao (SSC) komo esnan ku lo bai studia riba nan mes.

Pa por bini na remarke pa un di e fechanan ariba menshoná, mester presentá ku un prueba ku e studiante a hasi petishon na SSC òf DUO pa bai studia den eksterior e ‘studiejaar’ 2021/2022. Ta sugerí pa no warda te último momento pa reservá fecha pa èksamen teóriko i práktiko. Tene kuenta ku no por garantisá ku tur persona lo haña un fecha promé ku biaha pa eksterior. Pa personanan ku ta hasi 18 aña djis promé ku mester bai di biahe, ta konsehá pa konsultá kua ta e fechanan disponibel.

Tambe ta konsehá tur hóben ku ta bai Hulanda, pa pidi un ‘echtheidsverklaring’ despues di a saka su reibeweis. Por hasi petishon pa esaki online pa medio di loketdigital.gobiernu.cw. Skohe e produkto ‘Rijbewijs echtheidsverklaring aanvragen’ i yena e datonan nesesario pa hasi e petishon. Sin e ‘echtheidsverklaring’ akí, lo no ta posibel pa kambia e reibeweis di Kòrsou pa un reibeweis hulandes.

Pa mas informashon por tuma kontakto via number di telefòn 736-2929. Tambe por manda un mail na rijbewijzen.puz@gobiernu.cw.

Ministerio konserní