Publiká riba 27 Novèmber 2025
Willemstad- Manera ya a anunsiá, Departamento di Reibeweis di Asuntunan Públiko ta hasi posibel pa por pasa èksamen práktiko pa reibeweis di outo den vehíkulo outomátiko. Kandidatonan ku ke pasa èksamen práktiko den un vehíkulo outomátiko por inskribí ofisialmente for di promé di dezèmber 2025 na Departamento di Reibeweis na Sta. Rosaweg 36. E inskripshon ta kuminsá promé di Dezèmber 2025 i por sosodé sea personal òf via di un Rijschool. E hecho aki ta duna un kandidato oportunidat pa reservá un fecha di èksamen práktiko pa kuminsamentu di 2026.
Informashon importante
E èksamen práktiko ku vehíkulo outomátiko ta konta pa kategorianan di reibeweis A te ku D i ta sigui e mesun stándart di evaluashon kompará ku e èksamen ku vehíkulo manual/stèndert. Kandidatonan ku pasa èksamen den un vehíkulo outomátiko lo risibí un reibeweis ku limitashon. Konduktornan ku tin e tipo di reibeweis aki no ta outorisá pa manehá un vehíkulo stèndert. Dado kaso ku manehá un vehíkulo stèndert tòg, esaki ta konta komo un infrakshon di tráfiko. Si den futuro kier kore un vehíkulo stèndert den e kategoria di reibeweis ku e limitashon di outomátik, lo mester pasa un èksamen di nobo den e kategoria ei.
Na tur kandidato ku ya kaba a kuminsá e proseso pa pasa èksamen ku un vehíkulo manual/stèndert i ta deseá di hasi kambio pa pasa èksamen ku un vehíkulo outomátiko, por indiká esaki na momentu di reservá fecha pa e èksamen práktiko. E kambio aki no tin gastu adishonal.
Pa kualke pregunta, interesadonan por tuma kontakto ku Departamentu di Reibeweis na 736-2929 òf bishitá e website ofisial di Gobièrnu di Kòrsou.
