Notisia

Konferensia relashoná ku Éksito pa studiantenan Karibense

WILLEMSTAD – Ministerio di Enseñansa, Siensia, Kultura i Deporte (ESKD), ta informá ku nan ta partisipá aktivamente na e Konferensia relashoná ku “Éksito pa Studiantenan Karibense”, ku ta tuma lugá di 26 pa 28 di sèptèmber 2022. E konferensia di trabou ta konta ku partisipashon di tur pais di Reino Hulandes. Durante di e konferensia ta bai elaborá ku vários ‘stakeholders’ di enseñansa pa sigui traha na mehorashon di e situashon pa ku estudio i bin ku rekomendashonnan dirigí pa ku studiamentu na Hulanda.

Tur aña mas ku 1600 studiante ta sali di Karibe i bai Hulanda pa studia. Un kantidat chikitu ta kaba nan estudio i hopi ta kai afó pa vários motibu. P’esei na e konferensia ta bai bin ku un aserkamentu direkto riba e problemanan ku studiantenan ta topa kuné i ku tin influensia riba nan karera profeshonal. Último aña a traha dirigí riba e preparashon di konferensia. Ta e intenshon pa huntu traha i desaroyá  programanan ku ta bin ku rekomendashonnan dirigí, pa asina mas tantu studiante por tin éksito den nan estudio na Hulanda. Pa por logra esaki ta pone atenshon i énfasis na diferensia di kultural, idioma, i eskoho di estudio. E Konferensia ta keda tené na Universidat di Aruba  i ta keda ofisialmente habrí pa Minister di Enseñansa di Aruba sr. Endy Croes. Ta konta ku partisipashon di presidente di direktiva di Hogeschool Rotterdam sr. Ron Bormans, sekretario-general di enseñansa di Hulanda sra. Marjan Hammersma, representantenan di enseñansa di Aruba, Kòrsou, Boneiru, Sint Eustatius, Sint Maarten i Hulanda. Tambe rèktòrnan di universidatnan, partisipashon di direktivanan di skolnan di Kòrsou i representashon di enseñansa sekundario ta partisipá aktivamente den e konferensia aki. Tur partisipante  ta bai elaborá riba e temanan manera: posibilidat pa estudio, preparashon akadémiko, i mobilisashon pa ku estudio den Reino. Durante di e konferensia ta bai inougurá un plataforma komunikativo digital kaminda ta bai kompartí informashonnan éksitoso relashoná ku estudio na Hulanda(best practices).

For di aña 2021 durante di un konferensia ministerial di Reino relashoná ku enseñansa (Onderwijs Vierlanden Overleg) a traha un grupo di trabou (regiegroep) i a apuntá vários representante di gobièrnu i enseñansa pa traha riba un plan di aserkamentu pa drecha e situashon pa ku estudio di nos hóbennan di karibe. Durante di e konferensia na Aruba e grupo di trabou (regiegroep) ta presentá e situashon aktual, rekomendashonnan konkreto i inkluso ta tuma mas punto di balor di tur e partisipantenan pa pone den e dokumento final ku tur rekomendashonnan ku ta keda presentá den e próksimo reunion ministerial di Reino relashoná ku enseñansa na desèmber 2022.

Nota pa Redakshon: Pa mas informashon manera potrèt, video i entrevista por tuma kontakto ku lider di proyekto sra. Nicole Spellen na telefòn: +31 6211 55330 i/òf koreo elektróniko mail n.l.s.spellen@hva.nl.

MAS NOTISIA

Ministerio konserní: Enseñansa, Siensia, Kultura & Deporte