Publiká riba 23 Yanüari 2019
Willemstad – Visiblemente orguyoso di tur loke a logra durante di e promé edishon di e Bon Biní for Business Summit, Promé Minister Eugene Ruggenaath a anunsiá ku e aña aki mes ta bin un di dos summit. E biaha aki ta trata uso di teknologia pa yega na e aspekto di ʹSmart Cityʹ kombiná ku e balor di patrimonio nashonal.
Mas ku 300 empresario lokal i Ulandes, representantenan di gobièrnu di Kòrsou i di Ulanda i otro interesadonan, ta wak bèk masha kontentu riba e promé Bon Bini for Business Summit na Kòrsou. Riba djaluna 21 i djamars 22 di yanüari 2019 e summit ku ta un inisiativa di Promé Minister Eugene Ruggenaath di Kòrsou i Promé Minister Mark Rutte di Ulanda, a tuma lugá na Renaissance Curaçao Resort & Casino. Minister di Desaroyo Ekonómiko sr. Steven Martina a duna hopi kontenido na e summit for di su tarea komo mandatario ku tin ekonomia den su kartera. Minister Zita Jesus-Leito i Sekretario di Estado di Asuntunan di Reino, sr. Raymond Knops, tambe a duna hopi koperashon den e total. Meta di e summit aki tabata pa trese invershonistanan di Ulanda na Kòrsou pa nan sera konosí ku empresarionan lokal i asina huntu krea invershonnan nobo ku por krea oportunidat pa mas kupo di trabou i un mihó ekonomia.
Despues ku Minister Presidènt Rutte i Minister Presidènt Ruggenaath a habri e summit ofisialmente riba e promé dia, a sigui un kantidat grandi di presentashonnan i diskushonnan amplio riba diferente tema. Entre nan entre otro: Kòrsou, ántes i awor, Perspektiva ekonómiko i oportunidatnan pa hasi negoshi na Kòrsou, Kòrsou komo ‘living lab’, Koperashon trans-atlantiko, Importansia di bon koperashon pa alkansá logronan, Dikon invertí den turismo i Finansiamentu.
E dia a kulminá ku firmamentu di e konbenio importante di koperashon di Strategia di Kresementu Kòrsou, ku ta nifiká un impulso nobo den e relashon ku Ulanda. Tambe a firma sigur 8 akuerdo konkreto entre kompanianan Ulandes i kompanianan lokal, durante di e summit. Akuerdonan manera entre otro unu pa koperashon entre Ministerio di Desaroyo Ekonómiko di Kòrsou i e kompanianan Innovate Today, KplusV i Amsterdam Centre of Entrepreneurship; Memoradum of Understanding pa koperashon riba e tereno marítimo; Mantenshon di barku i konstrukshon di barku na Kòrsou entre Alewijnse Marine i Damen Shiprepair Curacao; Initial Masterplan Bullenbaai entre Curaçao Ports Authority (CPA) i Havenbedrijf Rotterdam pa desaroyo di Bullenbaai.
Riba e di dos dia, a sigui mas presentashon i pènèl ku tópikonan manera Ekonomia resistente, ‘Smart Nation Curaçao’, Desaroyo di e sektor finansiero, tratadonan di invershon bilateral, Hasi negoshi na Kòrsou; Fasilidatnan i insentivo i hasi negoshi pafó di Reino. Rekoridonan den nos sentronan di siudat, bishitanan na kompanianan lokal i oportunidat amplio pa negosiantenan topa otro den un esfera ameno, sigur lo sòru pa mas akuerdo entre e kompanianan di Ulanda i di Kòrsou den e simannan ku ta sigui. I asina e promé Bon Bini for Business Summit a i lo duna frutanan konkreto pa adelanto di nos pais.
