Eksitoso tayer kon pa intermediá organisá pa ámtenarnan - Informashon tokante Gobièrnu di Kòrsou

Notisia

Ministerio konserní Asuntunan General i Promé Minister
 

Eksitoso tayer kon pa intermediá organisá pa ámtenarnan

Publiká riba 20 Òktober 2022

WILLEMSTAD – Di 11 te ku 14 di òktober 2022, un total di 85 ámtenar a partisipá na e tayer kon pa intermediá. E tayer a keda organisá pa Direktorado di Asuntunan di Lei i Kasonan Hurídiko (Directie Wetgeving & Juridische Zaken – WJZ) di Ministerio di Asuntunan General i Departamento di Rekurso Humano di Ministerio di Gobernashon, Planifikashon i Servisio Públiko. Fasilitadó di e tayer tabata The Lime Tree.

Na momento ku para ketu na mediashon, di bia ta pensa na divorsio òf mediashon durante kasonan den korte. Segun Pien Hoogenboom, kabes di Mediashon & Treinen na The Lime Tree, ta importante tambe pa sa kon pa intermediá durante kombersashonnan difísil i kaminda tin frikshon. Konflikto ta parti di vida i hustamente pa e motibu ei ta bon pa sa mas tokante konflikto i kon pa aktua. Esaki ta konta tantu ora ku bo mes tin di antendé ku un konflikto komo ora bo mester asistí otro hende durante un kombersashon fèrfelu. E abilidat pa por intermediá ta similar na tin e abilidat pa komuniká, pero den situashonnan tenso.

Jennifer Pawirodihardjo-Fer di WJZ ta di opinion ku personal di gobièrnu mester atendé ku hopi asuntu di siudadanonan. Tin bia e trabou ku ta ehersé tin gran influensia riba habitantenan. Esaki por resultá den konflikto chikitu, pero tin bia tambe den konfliktonan grandi i serio. Un komunikashon habrí ta importante den kasonan asin’akí i tur partido mester ta dispuesto pa yega na solushon. Komo ámtenar ta bira mas fásil pa dil ku konflikto na momentu ku tin mas konfiansa den e abilidat pa por intermediá. Esei ta kumbiní tantu e siudadano komo e ámtenar mes. Di e forma akí ta krea un ambiente di trabou kaminda tin mas espasio pa huntu yega na solushonnan en bes di krea konflikto. Esaki tambe tin impakto riba e relashonnan di trabou tantu paden komo pafó di gobièrnu. Esaki hasta por tin efekto positivo riba bo relashonnan personal.

Algun reakshon di partisipantenan tabata lo siguiente: “Mi a haña un bon idea tokante kon pa intermediá”, “e tayer tabata útil i edukativo”, “mi por apliká e téknikanan den práktika”.

The Lime Tree ta bai organisá otro aña na Kòrsou un tayer kon pa intermediá pa tur persona ku ta interesá!