Ekspanshon di Royal Palm Resort Curaçao ta bira realidat - Informashon tokante Gobièrnu di Kòrsou Bo opinion

Notisia

Ekspanshon di Royal Palm Resort Curaçao ta bira realidat

Geplaatst op 05 March 2021 dor di Ministerio Tráfiko, Transporte i Planifikashon Urbano

Willemstad – Pronto Kòrsou lo por disfrutá di un hoya di proyekto. Ta trata aki di e ekspanshon tremendo di Royal Palm Resort Curaçao. Gobièrnu di Kòrsou, atraves di Tim di Invershon, a pone man na obra pa por realisá esaki, ku sigur lo ta un estímulo sumamente grandi pa nos pais.

E proyekto magno di ekspanshon aki lo duna realse na e área di Zakito, i lo konsistí di 8 kompleho di 102 apartamento nobo. Un invershon total di 65 mion florin.

Pa fasilitá proyektonan ku ta kontribuí na ekonomia di Kòrsou a lanta un tim di invershon den Gobièrnu ku ta konsistí di diferente ministerio, ku e meta pa fasilitá tur invershonista den nan trabounan pa ku proyektonan. Esaki ta enserá entre otro aselerá petishonnan di tur tipo di pèrmit, i finansiá estudionan pa loke ta trata investigashonnan pa entre otro konstrukshonnan, infrastruktura, medio ambiente i naturalesa.

Promé Minister Sr. Eugenne Ruggenaath, komo esun na kabes di Tim di Invershon ta sumamente satisfecho ku e logro impreshonante aki. Minister Martina a kontribuí ku tur pèrmit ekonómiko nesesario pa por realisá esaki. Esaki sigur lo sòru pa mas kupo di trabou pa nos hendenan. Minister Jesus-Leito a kontribuí ku tereno den forma di ‘erfpacht’, ku pèrmitnan di konstrukshon, i un ‘Letter of Intent’ pa uso di e laguna. Banda di tur esaki, Minister Gijsbertha a sòru pa e konosido ‘tax holiday’ ku empresanan asinaki por risibí konforme nos leinan.

Den un ekipo interministerial a traha di un forma konstruktivo huntu ku e invershonista pa yega na e fase di proyekto aki na bienestar di nos komunidat.

Entrega di pèrmit di konstrukshon

Firmamentu di ‘Letter of Intent’

Ministerio konserní