Publiká riba 03 Yanüari 2019
Dia 20 di dezèmber último, despues di fayesimentu trágiko di un motosiklista, Minister di Hustisia Quincy Girigorie, a tuma nota di un komentario kompletamente inapropiá i inaseptabel riba kuenta di Facebook personal di bosero di Ministerio Públiko. Inmediatamente Minister a tuma kontakto ku Fiskal Mayó di Ministerio Públiko, ku a informá Minister di e pasonan ku ya nan a tuma den e kaso aki.
Durante un kombersashon entre tòp di Ministerio Públiko i e bosero en kuestion, esaki a distansiá su mes for di e komentario i a splika ku e komentario ku a surgi for di su profil ta debí ku a ‘hack’ su kuenta di Facebook. Konsekuentemente el a entregá un keho na Polis, basá riba e echo ku su kuenta di Facebook a keda malusá.
For di punto di bista di un bon doño di trabou, Minister ta konsiderá korekto ku Ministerio Públiko a respetá e deklarashon di e persona en kuestion i aun mas pa motibu ku e bosero a entregá un keho ofisial, ku por a wòrdu investigá debidamente. Si for di e investigashon sali eventualmente ku e bosero a aktua di un òf otro forma no korekto, lo por tuma pasonan nesesario. Minister a urgi Ministerio Públiko i Kuerpo Polisial pa duna prioridat na e investigashon aki, mirando ku e kaso aki ta unu serio ku a tacha e imágen i kredibilidat di Ministerio Públiko den henter nos komunidat. Den e último siman aki Minister a duna espasio na OM pa e investigashon tuma lugá.
Entretantu, e promé fase di e investigashon a keda konkluí i Minister a wòrdu informá di e resultado, esta: ku e vershon ku e kuenta di
Facebook personal di e bosero di Ministerio Públiko a keda di ‘hack’ NO ta basá riba realidat. E bosero a rekonosé ku ta e mes ta responsabel pa e komentarionan ku a keda hasí riba su kuenta personal di Facebook.
Konsekutivamente, despues di a skucha e persona en kuestion, awe mainta dia 2 di yanüari 2019, e bosero a risibí un karta di Minister a base di kua e ta keda prohibí inmediatamente entrada na ofisinanan di Ministerio Públiko i el a keda informá ku lo inisiá un proseso disiplinario severo kontra su persona.
Manera komunidat ta na altura, no ta Minister Girigorie su kustumber pa reakshoná riba prosesonan disiplinario kontra di trahadónan públiko. Sinembargo Minister ta konsiderá e kaso aki unu di tal índole, ku ta nesesario pa e informá nos komunidat. Ministerio Públiko ta un órgano ku tei pa sirbi bienestar di henter pueblo di Kòrsou i sali na defensa di e pueblo kontra esnan ku faya kontra nos reglanan penal i komo tal, OM ta representá kada un di nos. E komentarionan denigrante ku a wòrdu hasí dor di un persona ku ta kara di Ministerio Publiko no ta kuadra ku tarea di e instituto aki i a tacha su imágen i kredibilidat. Mas aleu ta inaseptabel ku un persona den un funshon di tal índole den e kadena hudisial no ta aseptá responsabilidat pa su fayo i ta opta pa no papia bèrdat. Integridat ta konta spesialmente pa representantenan di Hustisia.
Komo tal, Minister Girigorie ta kondená e komentarionan aki un biaha mas kategórikamente i ta di opinion ku e persona en kuestion a demostrá di no ta apto pa funshoná komo bosero di Ministerio Públiko. Un dicho ta bisa: “…Hustisia no solamente mester wòrdu hasí, pero komunidat mester mira tambe ku e ta tuma lugá ……”. Hustisia ta konta pa un i tur.
Por último, Minister Girigorie ta informá komunidat, ku e investigashon atministrativo en kuantu e akontesimentunan ku a guia na robo di un kantidat supstansial di droga for di un instalashon Polisial den òktober último, ta den su fase final i Minister lo risibí e rapòrt fin di yanüari 2019.
