Elekshon pa representantenan pa komishon di Bùs Chikí i Mediano, Taksi i ‘Toerwagen’ djasabra awor na Klup di Shell - Informashon tokante Gobièrnu di Kòrsou Bo opinion

Notisia

Elekshon pa representantenan pa komishon di Bùs Chikí i Mediano, Taksi i ‘Toerwagen’ djasabra awor na Klup di Shell

Geplaatst op 15 October 2020 dor di Ministerio Tráfiko, Transporte i Planifikashon Urbano

WILLEMSTAD – Djasabra 17 di òktober 2020 ta tuma lugá elekshon pa komishon di bùs chikí i mediano, taksi i di ‘toerwagen’. Esaki lo tuma lugá den Klup di Shell na Suffisant di 9’or di mainta pa 3’or di atardi. Departamentu di Asuntunan Públiko (Kranshi) ta organisá e elekshon na nòmber di Ministerio di Tráfiko, Transporte i Planifikashon Urbano.

Miembronan ku ta bini na remarke pa vota por pasa djasabra awor entre 9’or di mainta pa 3’or di atardi na Klup di Shell na Suffisant pa depositá nan voto. Tur e personanan ku por vota mester presentá ku nan pèrmit i identifikashon bálido. Solamente esnan ku tin pèrmit bálido pues por partisipá.

Na Klup di Shell lo apliká tur medida ku Gobièrnu a stipulá pa protekshon di salú kontra di COVID-19. Entre otro no ta pèrmití niun persona drenta paden sin tapaboka.

Tur persona ku tabata interesá pa ta kandidato pa forma e komishon i bai elekshon, por a postulá nan mes te ku 14 di òktober. Djaweps 15 di òktober, e komishon di elekshon a reuní pa determiná balides di e kandidatonan. Tambe a tira lòt pa determiná e komposishon di e listanan di kandidato. A konkluí ku un total di 10 kandidato a postulá nan mes pa elekshon di komishon di bus chikí. Pa taksi, niun persona no a postulá pa elekshon.

Minister Jesus-Leito ta deseá tur kantidato ku ta partisipá na elekshon éksito ku esaki i ta spera riba un bon koperashon den futuro.

 

Ministerio konserní