Publiká riba 09 Yanüari 2020
WILLEMSTAD – Promé Minister, sr. Eugene Rhuggenaath resientemente a risibí e Embahador di India stashoná na Den Haag, sr. Venu Rajamony. Den un kòmbersashon ameno entre Promé Minister Rhuggenaath i sr. Rajamony a para ketu riba e diferente posibel áreanan di koperashon entre Kòrsou i India. Alabes a dediká tempu na e importansia di aktividatnan komersial na Kòrsou dirigí pa empresarionan ku ta (desendiente) di India.
E liña prinsipal di e reunion tabata pa identifiká algún sektor i/òf proyektonan potenshal pa sigui investigá pa yega na mas kolaborashon. Asina a elaborá riba e ekspertisio i posishon di liderazgo ku durante basta aña India ta disponé di dje riba tereno di teknologia. Di e forma aki a yega na puntonan di akshon konkreto ku ta enserá un kuadro mas profundo di kiko e industria aki por nifiká pa Kòrsou sea pa interkambio di konosementu òf komo proyekto di invershon den sektor teknológiko na Kòrsou.
E enkuentro entre Promé Minister Rhuggenaath i Embahador Rajamony a terminá ku un bunita gesto di CPost International ku a hasi entrega di un stampia konmemorativo di e konosido ikono mundial Mahatma Gandhi. E stampia aki a keda produsí pa selebrá e di 150 aniversario di nasementu di Mahatma Gandhi. Riba e stampia por mira un pintura di Gandhi huntu ku un di su frasenan mas konosí: “Be the change that you wish to see in the world”, pèrkurá pa bo mes ta e kambio ku bo ke mira den mundu.
Durante e bishita aki Embahador Rajamony tabata tin enkuentro ku Gobernador di Kòrsou, Su Ekselensia sra. Lucille George-Wout, Minister di Desaroyo Ekonómiko, sra. Giselle Mc William, Minister di Salú, Medio Ambiente i Naturalesa, sra. Susanne Camelia-Römer i ku representantenan di CURINDE. Igualmente e komunidat di India na Kòrsou a organisá un resèpsi kaminda por a kòmbersá ku e Embahador.
Embahador Rajamony ta pa di dos biaha di bishita na Kòrsou komo parti di un rekorido den Karibe ku ta inkluí bishita na Sint Maarten, Aruba i Bonèiru tambe. Ta trata di un Embahador karismátiko ku a skibi diferente buki. Su buki mas resién titulá ‘India and the Netherlands: Past, Present, Future’ ta konta ampliamente tokante e relashon durante siglonan entre India i Hulanda.
