Embahador di Reino na Port au Spain, sr. Raphael Varga a bishitá Ministerio di Desaroyo Ekonómiko - Informashon tokante Gobièrnu di Kòrsou Bo opinion

Notisia

Embahador di Reino na Port au Spain, sr. Raphael Varga a bishitá Ministerio di Desaroyo Ekonómiko

Geplaatst op 23 January 2020 dor di Ministerio Desaroyo Ekonómiko

Djárason 22 di yanüari último, sekretario General di Ministerio di Desaroyo Ekonómiko, sr. Xavier Prens huntu ku Direktor di e sektor di Relashonnan Ekonómiko ku Eksterior, sra. Vanessa Toré a risibí un bishita di kortesia di Embahador di Reino na Port of Spain, Trinidad & Tobago, sr. Raphael Varga.
Na novèmber di aña pasá sr. Varga a asumí e puesto komo embahador di Reino na Trinidad & Tobago, inkluyendo tambe Barbados. Komo e kanal di kontakto ofisial i formal entre Gobièrnu di Reino i Gobièrnu di Trinidad & Tobago, Sr. Varga a bin pa sera konosí ku nos Ministerio i tambe haña un idea di lokenan ta importante pa Kòrsou  su relashonan ku Trinidad & Tobago.

E merkado di Trinidad & Tobago ta unu sumamente interesante pa nos empresanan lokal, en espesial nos fabrikantenan, nos Zona Franka i tambe dunadónan di servisio. Pa Turismo tambe Trinidad & Tobago ta di gran balor. Den transkurso di aña pasa, e koperashon entre Gobiernu di Kòrsou i esun di Trinidad & Tobago ya a resultá entre otro den un relashon estrecho entre KTK i su kontra parte na Trinidad i tambe inisio di buelonan di Caribbean Airlines pa Kòrsou ku a faboresé komersio for di Zona Franka i oumento di turismo for di Karibe. Durante e bishita a interkambiá ku sr Varga no solamente riba e éksitonan di aña pasa pero tambe riba plannan i inisiativanan di MEO pa e aña aki pa asina sigi konstruí, mehorá i oumentá nos relashonnan komersial ku Trinidad & Tobago.

 

 

 

 

 

 

Ministerio konserní