Notisia

Riba e potrètnan athunto por tuma nota di Minister Charles Cooper i e embahadornan.

WILLEMSTAD – Awe Minister di Tráfiko, Transporte i Planifikashon Urbano sr. Charles Cooper a hasi entrega di e yabi di Willemstad na e embahadornan di Karnaval 2024. Minister di Enseñansa, Siensia, Kultura i Deporte sr. Sithree van Heydoorn no por a hasi esaki pa motibu di biahe di trabou i su suplente Minister Charles Cooper a risibí tur e embahadornan na ofisina pa hasi e entrega di forma ofishal.

E yabinan di Willemstad a keda kreá i traha pa e kompania 7.1 Experience di Giovanni i Angelica Abath. Sra. Angelica Abath a hasi entrega di e yabinan na Minister. Despues e yabinan di Willemstad a keda entregá na e embahadornan di e paradanan.

Durante di un bishita ameno Minister Cooper a será konosí di forma ofishal ku tur e embahadornan. Na mes momentu Minister a kombersá ku tur e hóbennan i pidinan pa nan sigui di ta un bon ehempel, no solamente den e marchanan pero tambe komo un embahador responsabel pa nos pueblo henter aña. Minister Cooper a yama nan danki for di awor pa e bon trabou ku nan ta bai hasi durante di simannan intensivo di nos fiesta nashonal kultura mas grandi ku nos ta selebrá.

Minister Cooper ta deseá henter komunidat un felis Karnaval 2024 i ta pidi pa nos ban gosa di forma responsabel.

—

KOMUNIKASHON

Pa mas potrèt bishitá: Entrega di Yabi di Willemstad