Publiká riba 22 Ougùstùs 2024
Willemstad – Minister di Desaroyo Ekonómiko di Kòrsou a risibí bishita di Minister di asuntunan Ekonómiko, Komunikashon i Desaroyo Sostenibel di Aruba, Geofrey Wever, dia 16 di ougùstus ultimo. Tabata trata di un bishita di trabou i di interkambio di informashon. Direktora di Departamentu di Ekonomia di Aruba Maria Dijkhof-Pita a kompañá Minister Wever. E bishita tabata den kuadro di e MOU ku e dos mandatarionan a firma aña pasá pa fortifiká e lasonan ekonómiko i komersial entre Aruba i Kòrsou i durante di e bishita a haña espasio pa profundisá i yega na palabrashonan konkreto pa realisá proyektonan importante pa desaroyo di ambos país.
Un di e topikonan prinsipal tabata e kontinuashon di e proyekto di Fast Ferry entre Aruba i Kòrsou, ku ta un proyekto ku lo yuda fortalesé e konektividat entre e dos islanan. Ambos mandatario a mustra kompromiso pa sigui ku e proyekto aki, i a palabrá ku lo buska asistensia tékniko na Hulanda pa sigui kana e trayekto aki. Ya pa algún aña kaba ta trahando riba e proyekto di Fast Ferry i aworaki tin mester di dal algún paso konkreto i ambos partido lo agregá e proyekto di Fast Ferry den e agenda di implementashon di e “Landspakket”. E reunión a toka tambe topikonan manera koperashon entre Aruba Fair Trade Authority i Fair Trade Authority Curaçao ku a firma un akuerdo di koperashon pa kolaborashon i interkambio di informashon.
Varios topiko mas a keda diskutí entre ambos delegashonan i a palabrá ku lo desaroyá un agenda di trabou i lo pone reunionan regular virtual pa asina garantisá ku e akuerdo di koperashon firmá ta keda realisá eksitosamente.
E bishita di trabou aki tabata fruktifero i a kana den un esfera ameno i e tabata un bon momentu pa konsolidá e koperashon i pa fortifiká e lasonan entre Aruba i Kòrsou.
