Publiká riba 17 Desèmber 2021
WILLEMSTAD – Minister Ruisandro Cijntje a inisiá su bishita di 3 dia na Colombia djaluna mainta na siudat di Bogotá. Durante di un enkuentro sumamente produktivo i agradabel, Minister Cijntje i Minister Maria Ximena Lombana a dialogá tokante e akuerdo komersial ku ta den negosiashon, formanan ku e dos paisnan por koperá i tambe tokante desaroyonan relashoná ku rekuperashon ekonómiko post-Covid.
Konkretamente e dos mandatarionan a yega na e palabrashon ku e akuerdo komersial ku ta den negosiashon ku Colombia lo keda konkluí na luna di Mart 2022. E dos ekiponan lo sòru pa atendé e puntonan ku falta, kual ta masha poko. Minister Lombana a mustra masha interes den nos desaroyo energétiko i a pidi Minister Cijntje pa nan sigui kombersá tokante e posibilidatnan. Colombia tin vasto eksperensia riba tereno di refinamentu di petroli i transishon pa energia renovabel i a ofresé yudansa riba e parti akí. Ademas Minister Lombana a mustra ku Colombia ta den e tòp 12 di mundu ku ta dediká na Turismo Sostenibel, esta kaminda e biahero moderno ta mas en buska di e produkto turístiko dirigí riba naturalesa, herensia, integrashon ku komunidat i konservashon di medio ambiente. Colombia ta interesá pa yuda Kòrsou desaroyá den e área akí i Minister Cijntje a aseptá esaki ku mil amor. “Kòrsou tambe ta bai traha riba diversifikashon di su sektor turístiko i esaki ta sigur un proposishon ku mi ta aseptá ku mil amor”, e mandatario di Ekonomia di Kòrsou a kontestá.
Rekuperashon
Colombia ta mira un kresementu relámpago di 10% na siere di 2021 apesar ku e pandemia ketubai ta den desaroyo. Esaki ta debí na e maneho dirigí di e gobernashon di Colombia pa invertí den empresanan mikro, chikí i mediano. Sosten na empresarionan a traves di finansiamentu direkto i un fondo di garantia a boost e empresanan i ekonomia. Ademas un supsidio di gobièrnu pa garantisá pago di salario mínimo di 40% i supsidio di 25% di salario pa pago di salario na hóbennan entre 18 i 23 aña di edat, a yuda eliminá desempleo i rekuperá kuponan di trabou ku a bai pèrdí. Promé ku pandemia esaki tabata 9%, durante pandemia el a bira 19% i awor a bai bek 12%. Esaki sin duda ta di atmirá. Minister Lombana tambe a duna di konosé ku empresanan den e sektor di produkshon, espesialmente agro industria, a krese i a empleá hopi hende i dor di stimulá eksportashon mas hende a logra haña trabou. Den 2021, mas ku 160 mil empresa nobo a keda lantá na Colombia ku tambe a yuda e kresementu akí. E plan di bakunashon a yuda enormemente den lanta e pais bèk. Mas di 70% di e pais a risibí nan promé bakuna i ta trahando pa garantisá e di dos bakuna ya asina por sigui ku e maneho pa sigui fleksibilisá i sigui habri ekonomia Colombiano.
Durante e bishita akí, Minister Cijntje a keda kompañá pa Embahador di Reino Ernst Noorman, Presidente di Kámara di Komèrsio sr. Billy Jonckheer i Direktor di Sektor di Koperashon Ekonómiko Internashonal di MEO sra. Vanessa Toré.
Minister Cijntje na final a ekstendé un invitashon na Minister Lombana pa bishitá Kòrsou na 2022. Minister Lombana su antepasadonan hudiu di parti tata tin vínkulo ku Kòrsou i ketubai ta establesé na Kòrsou, pues Minister Lombana sigur lo ta interesá pa topa nan.
