Publiká riba 08 Yanüari 2026
WILLEMSTAD – Riba 7 di yanüari 2026, Promé Minister sr. Gilmar Pisas a reuní ku Minister di Defensa di Reino, sr. Ruben Brekelmans. Minister Brekelmans ta na Kòrsou pa un bishita di trabou.
Durante di e enkuentro akí a trata diferente tema importante relashoná ku kartera di e Minister i e kolaborashon entre Hulanda i paisnan den Karibe. Espesialmente Promé Minister Pisas i Minister Brekelmans a interkambiá ku otro tokante e desaroyonan di último tempu i e situashon aktual den nos region entre Venezuela i Estados Unídos di Merka. Minister di Defensa Brekelmans a indiká ku Ministerio di Defensa a identifiká diferente senarionan, pero basá riba kalkulashonnan aktual, na e momentonan akí, no tin riesgo di un menasa militar eksterno den nos área ku lo por afektá Kòrsou.
No opstante esaki, Gobièrnu di Reino i Gobièrnu di Kòrsou lo keda monitor konhuntamente e desaroyonan den nos region i lo keda den komunikashon kontinuo ku otro. Finalmente a palabrá ku Gobièrnu di Reino den koperashon ku Gobièrnu di Kòrsou lo hasi un análisis di e akontesimentunan di último tempu, pa si ta nesesario hasi e ahustenan den e strategia di seguridat pa hinter Reino Hulandes, espesialmente pa e parti den region di Karibe.
E reunion a tuma lugá den un ambiente habrí i ameno, suprayando e importansia di kolaborashon i komprenshon mutuo den Reino.
