Notisia

Willemstad – Gobièrnu di Kòrsou ta lansa un enkuesta nashonal pa evaluá den ki grado siudadanonan di Kòrsou ta prepará pa situashonnan di emergensia i krísis. E enkuesta aki lo duna un mihó bista riba preparashon di pueblo pa situashonnan di emergensia, kua informashon nan ta usa i na unda tin espasio pa mehorashon.

E enkuesta ta parti di un proyekto ‘Enhancing Self-Reliance in Curaçao through Crisis and Disaster Preparedness Education’ (‘Mehorashon di Outosufisiensia na Kòrsou pa medio di Edukashon pa Preparashon pa Krísis i Kalamidat’) finansiá pa Union Europeo. Lo usa e resultadonan pa mehorá e maneho di krísis i komunikashon tokante situashonnan di emergensia, pa esaki konektá mihó ku loke komunidat mester. 

E investigashon den komunidat ta dura dos siman. Durante di e simannan akí, e tim di enkuesta lo bishitá diferente lokalidat rònt Kòrsou i lo aserká siudadanonan ku e petishon pa yena un enkuesta kòrtiku. Bo por rekonosé e tim di enkuesta na nan poloshirt kòrá ku e teksto ‘Survey team’ riba nan lomba.

Gobièrnu di Kòrsou ta invitá tur siudadano pa partisipá na e enkuesta na momentu ku un persona di e tim di enkuesta aserká bo. Partisipashon ta di forma boluntario i anónimo i ta dura mas o ménos 5 minüt pa yena. Kada kontribushon ta yuda pa haña un mihó bista riba kon prepará Kòrsou ta i kon por sigui mehorá nos preparashon huntu.

Ademas di partisipá na e enkuesta, siudadanonan mes por kuminsá tuma paso for di awor pa ta mihó prepará pa un situashon di emergensia. Un promé paso ta traha un pakete di emergensia. Ku un pakete di emergensia, bo kas tin tur loke ta nesesario pa pasa e promé periodo di un situashon di emergensia na mihó manera.

Un pakete di emergensia por konsistí, entre otro, di:

• Radio (transitor) di bateria ku bateria èkstra
• Pakete di promé asistensia (EHBO) ku instrukshon
• Flèshlait ku bateria i bateria èkstra
• Algun bela i un kaha di lusafé (wardá den un saku plèstik kontra di awa)
• Sèn kèsh
• Kopia di bo dokumentunan di identifikashon i pólisa di seguro
• Kopia di yabi di kas i outo(nan)
• Mapa di bo bario i un lista ku number i adrès di famia i konosínan
• Sèt di hèrmènt essensial: skrufdrai, player i martin etc.
• Awa pa bebe: 2-3 liter pa persona pa dia, pa mínimo 3 dia
• Kuminda empaketá duradero: kuminda den bleki, kuminda seku, etc.
• Produktonan sanitario: papel di wc, ‘kotèx’, sanitizer etc.
• Remedinan esensial den baki òf saku protehá kontra awa
• Un flùit pa laga servisio di emergensia sa unda bo ta
• ‘Duct tape’, kabuya (3 meter) i sambèchi (zakmes) 

Gobièrnu ta stimulá siudadanonan pa wak kiko tin kaba na kas i kiko falta ainda. Un bon preparashon no mester sosodé den un dia. Kada paso ta yuda. 

Huntu nos ta kontribuí na un Kòrsou mihó prepará i mas resiliente. Lo hasi enkuesta na e siguiente lokalidatnan.

MAS NOTISIA

Ministerio konserní: Asuntunan General i Promé Minister