Publiká riba 28 Mei 2018
Willemstad – Tur alumno aktual di Feffik tin perspektiva garantisá i gobièrnu ta komprometé pa segurá kontinuidat di enseñansa di fishi. Gobièrnu ta komuniká na mayornan i alumnonan di Feffik ku tin skol djaluna 28 di mei normal pa alumnonan aktual.
Pa aña eskolar 2017-2018, segun informashon sumistrá pa Feffik, Feffik tin un total di 410 alumno, di kual 254 alumno ta sigui un estudio di SBO. Segun statutonan aktual di e fundashon, ehekushon di SBO no ta tarea di Feffik. Di e 254 alumnonan ku ta sigui SBO na e momentunan aki, 157 alumno lo kaba nan estudio na yüni próksimo i 97 alumno lo mester kore un stazje den aña 2018- 2019 pa kaba nan estudio. E 97 studiantenan aki tin garantia pa sigui nan estudio na Nilda Pinto òf na RKMTS, kual ta skolnan SBO ku tin dosentenan profeshonal prepará pa guia e alumnonan.
Aktualmente tin 156 alumno na Feffik ku ta sigui enseñansa profeshonal di fishi. Di e grupo akí 113 alumno lo finalisá nan estudio na final di e aña eskolar eksistente. Pues tin 44 alumno ku mester haña guia pa hasi nan stazje den un kompania. E studiantenan akí ta bai kore nan stazje i dosentenan di Nilda Pinto lo fasilitá e guia. Gobièrnu ta invertí subsidio adishonal na e skolnan eksistente pa sigurá ku tur 44 alumno por sigui i terminá nan estudio profeshonal. Tambe lo sòru pa un plan di kuido stipulá pa guia kada studiante.
Alabes pa alumnonan ku tin interes di bai Feffik den aña eskolar benidero (2018-2019), gobièrnu lo lanta un komishon spesífiko pa organisá un inskripshon sentral i regla alokashon di alumnonan. Pues ta garantisá ku studiante ku kier siña un fishi, pero tambe trahadonan ku kier sigui enseñansa profeshonal di fishi, por hasi esaki den futuro.
Riba djaluna dia 29 di mei, Minister di Enseñansa, Siensia, Kultura i Deporte ta reuní ku diferente grupo di interes, ku a mustra nan preokupashon ku e plannan tokante Feffik. Den e dianan ku a pasa, Gobièrnu a tuma nota ku tin hopi informashon ta sirkulá ku ta trese pregunta i inseguridat den komunidat. Pa medio di un kampaña di informashon intensivo i maneranan pa esnan enbolbí semper por yega na kontestanan verídiko, Gobièrnu ke asumi su responsabilidat pa informá mas amplio tokante e tópiko importante aki.
Manera stipulá den su akuerdo di gobernashon, e gobièrnu aktual a tuma un desishon pa krea espasio pa porfín invertí den reforma di enseñansa di fishi. Tambe gobièrnu ta bini den futuro serkano ku un Instituto di fishi di kalidat mirando ku tin un nesesidat agudo pa enseñansa profeshonal ku ta akoplá ku merkado laboral i kuponan di trabou ku tin na e momentunan aki i den futuro. Gobièrnu a tuma e desishon aki despues ku a hasi su propio analísis di e echonan ku ya ta konosí pa basta tempu pa ku maneho, kalidat, kontenido i finansas.
Un enseñansa profeshonal di fishi, ku partisipashon aktivo di komersio i ku garantia di trabou, ta e obhetivo komun ku gobièrnu ta trahando pa realisá pa nos pais.
