Enseñansa ta habri parsialmente entrante 28 aprel 2021
Publiká riba 23 Aprel 2021
WILLEMSTAD – Gobièrnu di Kòrsou a tuma desishon ku, entrante 28 aprel 2021, skol di fundeshi i skol sekundario (VSBO/HAVO/VWO) ta habri bèk. E desishon aki ta unu di Ministerio di Enseñansa, Siensia, Kultura i Deporte den estrecho koperashon ku Tim di Krisis/EPI, Examenbureau (ETE) i Inspekshon di Enseñansa. Sentronan pre-eskolar tambe por habri, mientras SBO, HBO i edukashon universitario ainda ta sigui den forma virtual.
- Periodo di stazje pa studiantenan di SBO
– Formashon profeshonal (stazje) pa studiantenan di SBO, si por kontinuá den palabrashon ku e dunadó di trabou/empresa kaminda e studiante mester kompletá su periodo di práktika.
- Curaçao Avond Lyceum & Landsexamen (ETE)
– Èksamen, ‘herkansing’, ‘inzage’ i lèsnan (práktiko) na Curaçao Avond Lyceum i Landsexamen (ETE), por tuma lugá den gruponan di máksimo 6 persona na mes momentu den un lokal. Kandidatonan i personal mester tin nan roster ofisial komo komprobante pa por trafiká pa skol i bèk pa kas, teniendo kuenta ku máksimo un ora di tráfiko entre skol i kas.
- Eksonerashon pa mayornan
– Mayornan ku tin ku hiba mucha skol básiko of un sentro pre-eskolar, por hasi esaki parti mainta te ku 8’or i parti mèrdia entre 12’or i 2’or pa por hiba muchanan kas òf na un ‘naschoolse opvang’. Atardi, mayornan por buska e muchanan bèk entre 4:30’or pa 6’or di atardi. Pa sobrá di dia e reglanan di Plachi di Dia ta keda vingente. Alumnonan di Enseñansa Sekundario por bai skol segun nan roster. Mayornan mester tin un kopia di e roster, pa por hiba i buska nan yu.
- Eksonerashon pa personal den enseñansa
– Maestro i personal den enseñansa, ainda ta keda konsiderá komo hende den un funshon/proseso vital. Maestronan mester por mustra un komprobante di nan direktiva di skol komo prueba ku nan por trafiká pa skol i bèk pa kas.
– Reapertura di e partinan di enseñansa aki ta tuma lugá konforme e medidanan stringente di e resiente protokòl pa skolnan. Tur e direktivanan di skol, huntu ku e skolnan, ta responsabel pa e aplikashon di e medidanan di prekoushon den e skolnan. Mayornan ta keda informá di esaki via di e skolnan.
Pa tur e anunsionan di Enseñansa na Papiamentu: http://bit.ly/OWCS-23aprel-pap
Voor alle mededelingen over het Onderwijs in het Nederlands: http://bit.ly/OWCS-23april-nl
***************************************************************************
