Notisia

WILLEMSTAD – Tur alumno mester sigui e programa di enseñansa kompleto, ku skol ta brinda.  Un alumno mester ta na skol i no por keda sin bai skol paso vakashon ta serka di kuminsá. E kalendario eskolar ta indiká e fechanan ku kada alumno mester partisipá na djé konforme nos leinan di enseñansa. Pesei ta di sumo importansia pa informá i rekordá ku enseñansa ta obligatorio i ankrá den nos leinan. For di 1 di yanüari 1992 lei di enseñansa obligatorio ta na vigor i ta basá riba e derecho i deber di kada hóben pa haña enseñansa. Enseñansa obligatorio ta mará na edat òf poseshon di diploma. Pa por kumpli ku e lei di enseñansa obligatorio, kada mayor/tutor mester tin un bon bista riba e kontenido i konsekuensianan di enseñansa obligatorio. 

Inskripshon na skol i partisipashon aktivo na e programa di enseñansa ta obligatorio for di 1 di ougùstùs di e aña eskolar ku ta sigui, despues di e fecha ku un hóben a kumpli 4 aña di edat. Esaki ke men ku pa lei e mayor/tutor ta obligá na inskribí e hóben na tempu na un skol pa e aña eskolar ku ta sigui, despues ku e yu a kaba di kumpli 4 aña. E deber legal akí ta keda bálido te fin di e aña eskolar, den kua e hóben ta kumpli 18 aña òf te ora e haña su diploma di VSBO TKL òf PKL, HAVO/VWO òf di un estudio ekivalente i rekonosé, indiká pa minister. E deber legal akí ta kaduká na momento ku e mayor/tutor por demostrá ku e no ta responsabel mas pa inskribí e hóben.

Na momentu ku pa un òf otro motibu un alumno no por bai skol, e mester hasi un petishon pa haña dispensashon. Pa por haña pèrmit pa dispensashon pa sigui enseñansa, mayor i/òf tutor ta obligá legalmente pa hasi un petishon na direktor di skol. Ta duna dispensashon:

• Si e hóben ta strobá di bishitá skol òf di sigui sierto lès, pa motibu di sirkunstansianan di salú korporal òf mental;
• Si na ora di malesa di e hóben, e mayor/tutor pone e direktor na altura di esaki for di e promé dia;
• Si pa motibu di sirkunstansianan imprevisto i partikular no por obligá e hóben di bishitá skol i e mayor/tutor pone esaki na konosementu di e direktor for di e promé dia. Esaki segun kriterio di e ámtenar di enseñansa obligatorio i di akuerdo ku e direktor di sektor Enseñansa i Siensia di e ministerio.

Ehèmpel di posibel dispensashon pa motibu di sirkunstansianan imprevisto i partikular ta: ora tin kasamentu di un mayor/tutor, na ora di morto di un mayor/tutor i pa otro motibunan importante segun kriterio di e direktor di skol, pero no pa fakansi. Tambe den kaso ku un hóben tuma parti na un biahe di estudio ta duna dispensashon, fuera di e dianan liber di skol fihá pa lei. Esaki bou di e kondishon ku e skol ta stipulá e biahe di estudio den koordinashon estrecho ku inspekshon di enseñansa.

Pa mas informashon di Enseñansa Obligatorio por ‘download’: Foyeto Enseñansa Obligartorio (Leerplicht) mei 2021

MAS NOTISIA

Ministerio konserní: Enseñansa, Siensia, Kultura & Deporte