Notisia

WILLEMSTAD – Ministerio di OWCS konhuntamente ku Ministerio di BPD ta anunsiá ku registrashon pa bini na remarke pa transporte pa skol pa aña eskolar 2020-2021, ta tuma lugá na Lokèt di Pèrmit banda di Subway Saliña. Esaki entrante 20 di yüli 2020.

Durante añanan ku a pasa mayor òf tutor por a pasa na Bon Biní Business Center for di luna di mei pa registrá e yu. Tumando na kuenta e desaroyonan rondó di COVID-19, e registrashon no por a tuma lugá den luna di mei ku a pasa.

• Entrante 20 di yüli 2020 kada mayor/tutor por pasa na Lokèt di Pèrmit pa registrá e yu(nan) ku lo ke hasi uso di transpòrt pa skol pa e aña eskolar benidero. Pa por garantisá efisiensia i efektividat di e proseso di registrashon, Lokèt di Pèrmit a mara kada promé lèter di e fam na 2 dia den siman. Mayor/tutor por pasa registrá entre 8’or pa 5’or, nònstòp konforme un di e 2 dianan di su lèter di fam.
• Manteniendo instrukshon emití dor di Gobièrnu tokante aglomerashon i distansha sosial i siguiendo protokòl “Gobièrnu di Kòrsou”, Lokèt di Pèrmit ta introdusí algun instrukshon:
• No por tin aglomerashon den sala di espera. Representante mester warda pafó di edifisio den rei siguiendo instrukshon di e funshonario di seguridat.
• Den sala di espera mayor/tutor mester sigui instrukshon di e funshonario ku ta guia e proseso.
• Solamente 1 mayor/tutor por drenta edifisio pa registrashon. No ta posibel pa laga mucha drenta edifisio.
• Manera mayor/tutor drenta edifisio e mester hasi uso di ‘hand sanitizer’ na porta.
• Mayor/tutor ta haña un number ora e drenta edifisio.
• No ta posibel pa mayor/tutor hasi uso di e oportunidat na e momento ei pa atendé otro asuntunan ku Lokèt di Pèrmit ta ofresé. Den e kaso aki ta rekomendá pa hasi uso di fasilidatnan online i mail ku tin disponibel.

Unabes mayor/tutor hasi su petishon pa bini na remarke pa transpòrt pa skol e ta risibí un komprobante. Pa kualke informashon semper por tuma kontakto ku Lokèt di Pèrmit na  0800-1515 òf 433-3123.

Klek aki pa e:

1. Lista di dokumentonan nesesario pa petishon pa transpòrt pa skol.
2. Skema di registrashon pa transpòrt pa skol.

MAS NOTISIA

Ministerio konserní: Maneho di Gobernashon, Planifikashon i Servisio Públiko